ZAJ NYEEM NIAJ HNUB. Tim 22 lub 6 hlis 2022 (Daily reflection)

TIM 22 LUB 6 HLI, HNUB PLAUB LUB LIS PIAM 12 CAIJ NYOB NRUAB XYOOS
COV LUS NYOB HAUV MAS TAIS NTAWV MOO ZOO (MT7: 15-20)

Kwv tij Hmoob sawv daws, lub Moo Zoo nej hnov hauv hnub no muaj 2 yam hais rau peb.
Yam ib, Huab Tais Yes Xus qhia kom peb ceev faj cov yaj saub cuav.
Yam 2, Huab Tais Yes Xus ntuas kom peb txhob ua tus neeg zoo sab nraud xwb.
Cov kwv tij, cov yaj saub cuav yog cov lub ncauj niaj hnub tshaj txog Tswv Ntuj Lo Lus, tab sis lawv coj tus yam ntxwv tsis mus raws li cov lus lawv qhuab ntuas. 
Tej zaud nej yeej pom cov neeg zoo li no nyob hauv nej pawg ntseeg. Los tej zaum twb yog nej kiag los kuj muaj.
Yog li, Huab Tais Yes Xus thiaj ntuas kom peb txhob ua tus neeg zoo sab nraud xws li tus yaj tab sis sab hauv yog tus hma.
Peb yog ib tug neeg ntseeg, peb yuav tsum kawm ntawm Huab Tais Yes Xus, peb yuav tau xyaum yuam peb tus kheej, kom txawj xav qhov zoo, yuav ua dab tsi mas yuav tau muab xav kom txhij mam ua tawm los, peb hais li cas yuav tau ua li ntawd. Txhua yam peb ua los hais tawm, mas tsum tsom txog Tswv Ntuj rau lwm tus pom, yog tsom txog kev sib nyiam sib hlub.
Yog peb ua li no, mas peb cov hauj lwm thiaj yog lub txiv zoo, ces txog qhov kawg, peb thiaj tsis raug ntov pov tseg mog.