ZAJ NYEEM NIAJ HNUB. Tim 22 lub 8 hli 2022 (Daily reflection)

ZAJ NYEEM HNUB TIM 22 LUB 8 HLI, UA HMOOV NIAM MAB LIAB UA POJ HUAB TAIS
COV LUS NYOB HAUV MAS TAIS NTAWV MOO ZOO (MT 23: 13-22)

Kwv tij Hmoob sawv daws, Tswv Ntuj Lo Lus hauv hnub no kuj yog ntuas peb siab kom peb kav tsij ua hauj lwm raws peb txoj kab xwm, yog tias peb tsis ua raws li txoj kab xwm mas yog peb tab tom rhuav Tswv Ntuj lub luag hauj lwm ntag, xws li Huab Tais Yes Xus hais tias cov Kws Ntawv Ntshiab thiab cov Fas Lis Xais hla hiav txwv, hla tuam teb mus nrhiav kom tau ib tug neeg los hwm ntuj, tab sis thaum nrhiav tau lawd, lawv ho qhia kom tus ntawd mus taug txoj kev phem. 
Kwv tij Hmoob, yog thaum peb twm Tswv Ntuj Lo Lus ywj peb siab, peb nthuav kom muaj qab hau rau peb tab sis tsis muaj txiaj ntsim rau lwm tus, mas yog peb tau ntuas kom lwm tus yuam kev. Muaj tej zaus peb cov neeg ntseeg mas peb ua tus yam ntxwv tsis tsim nyog yog Yes Xus thwj tim ces yog peb ua tus piv txwv tsis zoo rau lwm tus pom, peb tau coj lwm tus kom yuam kev.
Cov kwv tij, peb yog neeg ntseeg coj Ntuj kev cai, tab sis yog peb tsis nyiam cov neeg txom nyem, peb tsis txawj sib hlub, peb tsis zam rau cov neeg ua tsis zoo rau peb, mas yog peb tab tom ua tus qauv tsis zoo rau lwm tus pom, ces lawv yuav hais tias cov neeg ntseeg txog Yes Xus yog cov neeg siab nqaim tsis txawj sib nyiam. Yog peb tab tom ua kom lwm tus yuam kev.
Yog li mas cov kwv tij, thaum nej tig los ntseeg Ntuj lawm, mas nej yuav tau kawm Huab Tais Yes Xus cov lus qhia, nej yuav tau hloov siab tshiab tiag tiag, mas nej thiaj tsis coj lwm tus mus rau qhov yuam kev mog. 
Nyob zoo sawv daws.