ZAJ NYEEM NIAJ HNUB. Tim 25 lub 6 hlis 2022 (Daily reflection)

TIM 25 LUB 6 HLI, NCO TXOG NIAM MAB LIAB LUB SIAB NTSHIAB
COV LUS NYOB HAUV LUS KAS NTAWV MOO ZOO (LK 2: 41-51)

Kwv tij Hmoob sawv daws, Ntawv Moo Zoo nej hnov hauv hnub no mas yog piav txog thaum Mab Liab thiab Yos Xes rov mus nriav nkawd tus me nyuam Yes Xus hauv lub tsheej Yes Lus Xas Les. Nkawd nrhiav tau nws nyob hauv nruab nrab cov thoob xwm ntawv nyob hauv lub Tuam Tsev Teev Ntuj, thaum ntawd Huab Tais Yes Xus muaj 12 xyoos. 
Thaum Huab Tais Yes Xus muaj 33 xyoos tej, nws raug ntsia saum Ntoo Cuam, muaj niam Mab Liab ua tus ntsia ntsoov nws tus tub rau dai txom nyem. Thaum ntawd, niam Mab Liab lub siab ntshe ntxhov npaum cas, mob npaum cas? Yuav tsis muaj leej twg ntsuas tau.
Kwv tij Hmoob, thaum nws Leej Tub ploj thiab ntsib kev txom nyem, mas nws tawm mus nrhiav thiab nrog nws Leej Tub koom ris txoj kev txom nyem. Li ntawd, peb yuav vam txog niam Mab Liab uas yog peb sawv daws niam, kom nws nrhiav peb, coj peb kev mus cuag nws Leej Tub Yes Xus mog.