ZAJ NYEEM NIAJ HNUB. Tim 25 lub 7 hli 2022 (Daily reflection)

ZAJ NYEEM HNUB TIM 25 LUB 7 HLI, UA HMOOV LEEJ NTSHIAB YAS KOS
COV LUS NYOB HAUV MAS TAIS NTAWV MOO ZOO (MT 20: 20-28)

Kwv tij Hmoob sawv daws, thaum Huab Tais Yes Xus tawm tuaj tshaj Ntuj lub Ceeb Tsheej mas zeej tsoom thiab cov thwj tim xav tias yog Huab Tais Yes Xus tab tom yuav qhib cov Yus Das lub Ceeb Tsheej tshiab nyob hauv lub ntiaj teb no, Huab Tais Yes Xus tab tom sawv los nqua hu sawv daws kom sawv tawm tsam cov nom tswv Los Mas, ntiab lawv tawm hauv thaj tsam Yus Das, ces Huab Tais Yes Xus yuav ua tus vaj tshiab kav lawv lub teb chaws tshiab. Yog li cov neeg raws Huab Tais Yes Xus thiaj xav ntsoov saib txog thaum Huab Tais Yes Xus tsa tau lub teb chaws tshiab, mas leej twg yuav tau ua nom ua tswv, leej twg yuav tau ua ob tug zaum ntawm Huab Tais Yes Xus sab xis thiab sab laug.
Niam Ntxes Npes Dais los yog Yas Kos thiab Zam nkawd niam thiaj los hais ntxhi rau Huab Tais Yes Xus, yog txog hnub Huab Tais Yes Xus sawv ua vaj thaum twg, mas thov cia Yas Kos thiab Zam tau zaum ntawm Huab Tais Yes Xus sab xis thiab sab laug, kom nkawd tau ris lub hwj chim xws li Huab Tais Yes Xus.
Kwv tij Hmoob, nej hnov li no mas yog nej rov tig ntsia hauv nej zej zos mas nej yuav pom tias muaj ib txhia neeg lawv tau lub hwj chim ua nom ua tswv mas yog vim lawv muab nyiaj xiab, lawv mus thov tus loj kom tsa lawv ua nom tiag. Cov nom tswv zoo li no mas lawv tsuas muaj lub siab xav lwg noj lwg haus, xav yuam tsoom pej xeem ua lawv qhev xwb. Yog li Huab Tais Yes Xus thiaj hais tias ‘leej twg xav ua tus loj nyob hauv nej, mas nws yuav ua nej tus tub txib. Leej twg xav ua nej tus thawj, mas nws yuav ua nej tus qhev.’ 
Cov kwv tij, lo lus tias ‘ua tus tub txib, ua tus qhev, ua tus tsob hwb’, yog kom peb ua peb tej kab xwm, peb tej hauj lwm niaj hnub, mas peb yuav txaus siab ntso thiab zoo siab ua. Peb ua ib txog hauj lwm dab tsi mas peb yuav ua nyob hauv kev nyiam kev hlub thiab khuv leej.
Cov kwv tij, thov kom nej nco ntsoov Huab Tais Yes Xus lo lus hauv hnub no mog, nej ua hauj lwm dab tsi mas nej yuav nco tias ‘nej yuav ua tus tub txib, nej yuav ua ib tug qhev, nej yuav tsum tsob hwb lwm tus.’
Nyob zoo sawv daws.