Zaj nyeem niaj hnub tim 27 lub 12 hlis 2022 (Daily reflection)

ZAJ NYEEM HNUB TIM 27 LUB 12 HLIS, UA HMOOV LEEJ NTSHIAB ZAM TUS SAU NTAWV MOO ZOO
COV LUS NYOB HAUV ZAM NTAWV MOO ZOO (Z 20: 2-8)

Kwv tij Hmoob sawv daws, lub Moo Zoo hnub no yuav hnov hais txog Mab Liab Mas Ntas Las, Xos Moos Pob Zeb, thiab tus thwj tim Yes Xus nyiam, tus no mas sawv daws txiav tias tej zaus yuav yog Zam tus sau Ntawv Moo Zoo. 
Lub Moo Zoo piav tias Mab Liab Mas Ntas Las sawv ntxov ntxov mus tom lub qhov ntxa lawv muab Huab Tais Yes Xus lub cev zwm rau, tab sis qhov nws pom mas yog lub qhov ntxa qhib thiab tsis pom Huab Tais Yes Xus tus qauv lawm, nws dhia rov los hais rau Xis Moos Pob Zeb thiab Zam nkawd, ces nkawd thiaj khiav mus saib, nkawd pom lub ntxa qhuav xws li Mab Liab Mas Ntas Las hais tiag.
Kwv tij Hmoob sawv daws, Mab Liab Mas Ntas Las yog ib tug nyiam Huab Tais Yes Xus tshaj tas sawv daws, nws lub siab dai duam rau Huab Tais Yes Xus, mas yog peb nyeem lub Moo Zoo ntxiv mus, peb yuav pom tias nws yuav yog thawj tug tau pom Huab Tais Yes Xus sawv rov los. Ntawm Xis Moos Pob Zeb mas nws yog tus muaj txoj kev ntseeg loj dua sawv daws, hos Zam mas yuav muab piv tau rau txoj kev nyiam.
Txoj kev ntseeg thiab txoj kev nyiam yuav ua lub zog txhawb peb kom khiav maj zeeg mus nrhiav Tswv Ntuj xws li Xis Moos Pob Zeb thiab Zam. Tiam sis peb yuav pom Tswv Ntuj tau mas peb tsum muab siab dai duam rau Tswv Ntuj xws li Mab Liab Mas Ntas Las.
Yog li mas kwv tij Hmoob sawv daws, thov kom nej tuav txoj kev ntseeg kom ruaj, nyiam Tswv Ntuj ib yam li Tswv Ntuj tau nyiam nej, nej yuav muab nej lub siab khi rau Tswv Ntuj mas nej thiaj yuav nrhiav tau Tswv Ntuj thiab tshaj tau lub Moo Zoo rau lwm tus mog.
Nyob zoo sawv daws.