Zaj nyeem niaj hnub tim 3 lub 12 hlis 2022 (Daily reflection)

ZAJ NYEEM HNUB TIM 3 LUB 12 HLIS, UA HMOOV NCO LEEJ NTSHIAB FAS NTSHIS KUS – XAS VIS YES
COV LUS NYOB HAUV MAS TAIS NTAWV MOO ZOO (MT 9: 35-10: 1,5A, 6-8)

Kwv tij Hmoob sawv daws, hnub no Koom Txoos ua hmoov nco Leej Ntshiab Fas Ntshis Kus – Xas Vis Yes. Los peb hais tias Leej Ntshiab Xas Vis Yes.
Leej Ntshiab Xas Vis Yes lub neej ua tub tshaj Ntuj Lus mas phim rau lub Moo Zoo hauv hnub no kawg. Leej Ntshiab Xas Vis Yes tau tuaj tshaj lub Moo Zoo txog Is Ntias teb, Zis Pees teb thiab Mas Les Xias teb. Leej Ntshiab Xas Vis Yes ua neej nrog cov neeg txom nyem cov neeg pluag mus txog hnub nws tso lub ntiaj teb no tseg. Nws ua raws li Huab Tais Yes Xus lo lus tias “Nej kho cov mob kom zoo, nej tsa cov tuag koj ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej rov pub dawb.”
Cov kwv tij, niaj hnub no nyob hauv peb tsoom Hmoob, mas peb muaj cov tub tshaj Ntuj Lus tsawg tsawg, yog li mas peb yuav niaj hnub sib koom siab thov Tswv Ntuj xaiv cov tub hluas ntxhais hluas hauv peb haiv Hmoob los ua Tswv Ntuj txoj hauj lwm, peb yuav thov Tswv Ntuj xa nws cov tub zog tuaj sau nws cov qoob nyob hauv peb haiv Hmoob raws li cov lus Txiv Plig Txhiaj Foom tau sau tseg tias “Peb tus Huab Tais Yes Xus Pleev, niaj hnub no peb nco koj lo lus tseem ceeb qhia peb tias ‘tseem tshuav ib co yaj uas tsis tau los nyob sab laj kab hauv no’, peb kuj nco txog tus Hauv Paus Xa Lus Paj Lug tej lus hais tias ‘cov tsis tau xub hnov koj lo lus, mas lawv yuav ua li cas ntseeg? Yog tsis muaj cov tub tshaj Ntuj Lo Lus, mas luag yuav ua cas hnov tau Tswv Ntuj lob Moo Zoo?’
Hnub no peb thov koj hu tej tus tub ntxhais hluas Hmoob kom los ua koj lub luag hauj lwm tshaj lub Moo Zoo. Thov koj pub koj Leej Ntuj Plig Ntshiab los tshoj kom muaj tej tus npaj siab los coj lub neej tab seeb ua Txiv Plig, ua Phauj, thiab ua Xib Hwb.”
Ntuj aib! Peb thov koj, Huab Tais Leej Txiv siab zoo.
Nyob zoo sawv daws.