Zaj nyeem niaj hnub tim 8 lub 12 hlis 2022 (Daily reflection)

ZAJ NYEEM HNUB TIM 8 LUB 12 HLIS, HNUB HWM NKAUJ TSIM TXIAJ MAB LIAB YUG LOS TSIS LO NEEG LUB KEEB TXHAUM
COV LUS NYOB HAUV LUS KAS NTAWV MOO ZOO (LK 1: 26-38)

Cov kwv tij Hmoob, zaj lus peb hnov hnub no yog cov lus tus Tshiab nrog tus ntxhais Mab Liab tham. Yog ib zaj zoo qhia rau peb tias thaum peb thov Ntuj mas peb yuav ua zoo li cas?
Cov kwv tij, thaum peb thov Ntuj ces yog peb tab tom nrog Tswv Ntuj tham, nrog Tswv Ntuj sib txuas lus; peb yuav ua tus mloog saib Tswv Ntuj hais dab tsi rau peb, txawm tias lo lus peb tau hnov ntawd yuav ua rau peb poob siab. Tsis kav Tswv Ntuj yuav hais ntxiv tias “Koj tsis txhob ntshai mog! Kuv saib koj ntxim kuv siab, kuv thiaj pub kom muaj tuaj rau koj zoo li ntawd. Qhov koj yuav ua mas yog ua raws li kuv lo lus.”
Yog li mas peb yuav hais rau Tswv Ntuj xws li tus ntxhais Mab Liab tau hais tias “Kuv tus Tswv Ntuj, kuv yog koj tus tub txib, los ntxhais txib xwb, kuv xav kom muaj raws li koj hais os.”
Nyob zoo sawv daws.