ZAJ NYEEM NIAJ HNUB. Tim 9 lub 5 hlis 2022 (Daily reflection)

HNUB TIM 9 LUB 5 HLIS, HNUB OB LUB LIS PIAM 4 CAIJ HLA

ยน 10:1-10

Kwv tij Hmoob, hnub no Huab Tais Yes Xus hais tias nws yog cov yaj lub qhov rooj, tus twg nkag ntawm lub qhov rooj mus mas tus ntawd thiaj yog tus tswv zov yaj, hos tus tsis nkag ntawm lub qhov rooj mus ces kawg yog tub sab xwb. Thiab Huab Tais Yes Xus tseem hais tias tus yaj twg nkag ntawm lub qhov rooj mus mas nws yuav tau kev cawm thiab tau lub tshav zaub noj.

Yog muab piv kom peb cov kwv tij Hmoob pom, mas yuav piv rau lub tshav yug nyuj. Peb yuav xov ua lub loog kom dav, cog nyom cog nroj kom ntsuab xiab mos nyoos rau cov nyuj tau ncig noj, thiab peb yuav tseg ib lub qhov rooj cia tau nkag mus mus los los. Tus nyuj twg tsis nkag mus hauv lub vaj loog ces kawg nrhiav noj thiab pw sab nraud, mas tsis paub tias puas yuav muaj tub sab los yog hma tuaj nyiag tom tus nyuj.

Kwv tij Hmoob sawv daws, Huab Tais Yes Xus yog lub qhov rooj, hos lub vaj tshav zaub ces txawm yog Ntuj Ceeb Tsheej, ntiaj teb neeg ces yog cov nyuj ntag.

Huab Tais Yes Xus tseem hais tias nws yog tus tswv zov yaj thiab dab phem yog tus tub sab tuaj nyiag cov yaj.

Yog peb yog cov nyuj, mas Huab Tais Yes Xus kuj yog tus tub yug nyuj. Nws niaj hnub coj peb mus noj zaub nyob hauv lub tshav zaub, thiab nws tseem niaj hnub tawm mus nrhiav cov nyuj nyob sab nraud lub vaj zaub, kom tau lawv cov nyuj ntawd los koom ua ib pab nyob hauv nws lub vaj zaub.

Kwv tij Hmoob sawv daws, niaj hnub no peb zoo xws li tus nyuj, mas peb yuav xaiv saib yuav mus noj zaub nyob hauv lub vaj zaub, los yeem ua nyuj qus nrhiav noj sab nraud mog!

Nyob zoo sawv daws.