ZAJ NYEEM NIAJAHNUB. Tim 21 lub 11 hli 2022 (Daily reflection)

ZAJ NYEEM HNUB TIM 21 LUB 11 HLIS, HNUB NCO TXOG CEV MAB LIAB RAU TSWV NTUJ
COV LUS NYOB HAUV LUS KAS NTAWV MOO ZOO (LK 21: 1-4)

Cov kwv tij Hmoob, niaj hnub chiv thaum peb mus teev Ntuj mas muaj ib yam peb yuav tsum ua; yog pub nyiaj rau lub tsev teev Ntuj. Cov kwv tij hauv lub Koom Txoos Plos Tes Taas mas lawv txoj raws cov Yus Das txoj cai hais tias tsum qee 1 feem 10 rau lub tsev teev Ntuj, tab sis lub Koom Txoos Kav Tos Liv txiav tias koj yuav muab ntau los tsawg, tsis txog 1 feem 10 yeej tau, tsuas yog thaum koj muab mas koj muab tawm dawb paug hauv koj lub siab los xwb ces yeej ntxim Tswv Ntuj siab lawm.

Lub Moo Zoo hnub no peb hnov Huab Tais Yes Xus hais txog nqe lus no; thaum Huab Tais Yes Xus pom tus poj ntsuam tso 2 lub txiaj toog rau hauv lub txhab ceev nyiaj, mas Huab Tais Yes Xus thiaj qhia rau cov thwj tim tias txawm tus poj ntsuam no muab 2 lub txiaj toog xwb, tsis kav Tswv Ntuj saib tias ntau dua cov muab nyiaj ntau cev rau lub tsev teev Ntuj vim tias nws txaus siab muab, nws muab qhov zoo tshaj hauv nws lub neej pub rau Tswv Ntuj. 

Cov kwv tij, thaum tus poj ntsuam muab nws 2 lub txiaj toog cev rau lub tsev teev Ntuj mas nws tsis xav ntau tias yog kuv muab pub rau lub tsev teev Ntuj lawm, kuv puas yuav muaj noj, kuv puas yuav muaj siv. 

Yog li mas cov kwv tij Hmoob, thaum peb pub nyiaj rau lub tsev teev Ntuj, pub nyiaj pab lwm tus, los yog thaum peb nqes tes ua ib txoj hauj lwm rau lwm tus, mas peb yuav xyaum yoog raws li tus poj ntsuam no, peb yuav tsis ua xyem xyav, yuav tsis muab xam saib puas nkim lub zog pab. Qhov peb yuav ua mas yog zoo siab hlo thiab tso siab tias muaj ib hnub Tswv Ntuj yuav ua tus pauj rov rau peb.

Nyob zoo sawv daws.