KUV NTSEEG TXOG TSWV NTUJ

Kuv ntseeg txog Tswv Ntuj, lo lus no muaj neeg kheev kheev nug tias : 

“Tswv Ntuj yog leej twg ?”

Lo lus teb mas muaj ntau lo. Ces yuav thov muab hais ua nqe zuj zus :
Nqe 1 : Tswv Ntuj yog ntsuj plig. Lo lus ntsuj plig, txhais tias 'nyob los yog muaj tiag'. Tab sis ntsuj plig tsis tuaj yeem yuav tuav thiab kov tau. Yam li ntsia tsis pom, tes tuav tsis tau, tsis muaj ntxhiab tsw, tsis muaj ntxhiab qab qaub, los tsuag thiab qab ntsev, tsis hnov suab dab tsi. 
Hais txog ntsuj plig, mas muab faib ua 3 hom. (1) Tswv Ntuj tus ntsuj plig, yog ib yam loj thiab nyob siab tshaj txhua yam. Vim Tswv Ntuj nyob mus ib txhiab ib txhis, tsis muaj pib thiab tsis muaj xaus. Tsis muaj leej twg tsim Tswv Ntuj, Tswv Ntuj nws muaj nws thiab nws nyob nws. (2) Ntsuj plig ntawm cov Tshiab, yog ntsuj plig uas Tswv Ntuj tsim, nws muaj qhov pib thiab nyob mus ib txhiab ib txhis tsis muaj kawg. Tas cov Tshiab uas Tswv Ntuj tsim los, cov ib co muaj xam khib thiab xav ua tus loj, xav ntxeev siab rau Tswv Ntuj, Tswv Ntuj thiaj rau txim thiab hu cov ntawd ua 'Xas Tas', los yog hais tias ntsuj plig phem. Qhov kawg tus ntsuj plig phem ntawd thiaj ntxias kom neeg ua txhaum. (3) Yog neeg tus ntsuj plig, Tswv Ntuj yog tus tsim neeg thiab ua kom neeg txawv cov Tshiab me ntsis. Yam li Tswv Ntuj pub kom ntsuj plig thiab neeg lub cev nqaij nyob ua ke, ces peb yuav pom neeg tus ntsuj plig ya mus los tsis tau. Lo lus hais tias 'tib neeg', yog txhais los ntawm lo lus tias 'lub siab'. Li ntawd, tib neeg thiaj muaj lub siab. Vim li ntawd, tib neeg thiaj muaj 2 yam nyob sib xyaws ua ke, xws li lub cev nqaij thiab tus ntsuj plig. Lub cev nqaij, mas xuas tes kov tau tuav tau, tab sis tus ntsuj plig, tes kov tsis tau. Lub cev nqaij thiab tus ntsuj plig yuav muab sib faib tsis tau. Li ntawd txoj kev tuag ntawm cov neeg ntseeg Kav Tos Liv, peb thiaj hais tias yog ntsuj plig ncaim ntawm lub cev lawm. Peb yuav tsis hu tus neeg uas tus ntsuj plig ncaim mus lawm ua neeg, peb yuav hu ua tus qauv tuag. 
Nqe 2 : Tswv Ntuj yog tus muaj txhij txhua thiab nyob tsis muaj kawg. Nyob hauv Tswv Ntuj tsis muaj qhov txhaum thiab yuam kev. Tswv Ntuj zoo txhij zoo txhua. Tswv Ntuj thiaj yog tus tswv ntawm kev hlub thiab nyiam ntiaj teb neeg txog qhov kawg. Tswv Ntuj yog kev zoo, yog kev hlub thiab muaj txhij txhua zoo tshaj nyob ntiaj teb no thiab nyob saum ntuj. Tswv Ntuj yog yav tag los, yog hnub no thiab yog yav tom ntej.
Nqe 3 : Tswv Ntuj yog ib tug 3 leeg nyob ua ke thiab sib luag zos. Yam li Leej Txiv, Leej Tub thiab Leej Ntuj Plig Ntshiab. Leej Txiv, Leej Tub thiab Leej Ntuj Plig Ntshiab 3 leeg sib koom nyob hauv ib tug. Yog yuav muab piv mas zoo ib yam li ib lub pov haum 3 nreej, uas sib luag thiab zoo nkauj xwm yeem ib yam. 
Lub npe Leej Txiv, Leej Tub thiab Leej Ntuj Pliag Ntshiab, mas yog lub cim peb ua los nco txog Tswv Ntuj. Thaum peb pom lub cim ntawd, mas peb paub tias Tswv Ntuj nyob hauv peb.
Leej Txiv, yog hais txog tus tsim ntuj tsim teb thiab tsim neeg. Ib yam li yog tib neeg Txiv, peb thiaj hu ua Leej Txiv.
Leej Tub, mas yog tus Tswv Ntuj kom yug los nyob ntiaj teb no, kom tau cawm ntiaj teb neeg fab ntsuj plig uas tuag mus lawm. Li ntawd, peb thiaj hu ua Leej Tub.
Leej Ntuj Plig Ntshiab, yog lub txiaj ntsim los yog hwj huam pab neeg zim txwv no. Tus muaj lub txiaj ntsim los yog Leej Ntuj Plig Ntshiab nyob hauv nws, mas nws yuav txawj ua siab loj siab tawv tiv txhua yam kev phem. Peb thiaj hu ua Leej Ntuj Plig Ntshiab.
Muaj coob leej ua xyem xyav tias thaum Tswv Ntuj tsim ntuj tsim teb thiab tsim txhua tsav puas yam, puas yog Tswv Ntuj tsim Leej Tub thiab Leej Ntuj Plig Ntshiab ? Thaum Leej Tub nqes los ua neeg nyob ntiaj teb no, mas Leej Txiv thiab Leej Ntuj Plig Ntshiab puas nqes los ?
Peb yuav teb hais tias txhua yam ib txhij tshwm sim ua ke, vim Leej Txiv, Leej Tub thiab Leej Ntuj Plig Ntshiab yog tib tug xwb.
Kuj tseem muaj tej lo lus nug tias leej twg yog tus tshwm sim ua ntej thiab leej twg yog tus tshwm sim tom qab, tug twg yog tus loj, tus twg yog tus me ?
Yog yuav xav li tib neeg xav, mas xub muaj Tswv Ntuj tag mam muaj Leej Tub, ces Leej Ntuj Plig Ntshiab yog tus tom qab kawg nkaus. Tab sis yog peb xav tias Tswv Ntuj zoo li ib lub pov haum 3 nreej uas sib luag thiab zoo nkauj xwm yeem, mas peb yuav to taub tias Leej Txiv, Leej Tub thiab Leej Ntuj Plig Ntshiab loj sib luag, vim lawv yog ib tug xwb. 
Thov kom peb nco ntsoov tias peb tab tom nyob hauv txoj kev ncaj ncees thiab txoj kev ntseeg. Ces tsis muaj leej twg yuav ntsuas tau Tswv Ntuj nyob hauv nws lub tswv yim thiab cov kws txuj kuj tsis muaj leej twg tuaj yeem ntsuas tau. 
Nqe 4 : Tswv Ntuj nyob tas qhov txhia chaw, Tswv Ntuj paub thiab pom tag yav tag los, pom tag zim txwv no thiab pom tag yav tom ntej. Vim Tswv Ntuj tsis muaj caij muaj thaum, thiab nws nyob mus ib txhiab ib txhis. Li ntawd, tsis muaj ib yam yuav zais ntshis thiab npog Tswv Ntuj tau. Yam zais ntshis thiab npog dub nciab nyob ntiaj teb no, Tswv Ntuj yeej paub thiab pom tas. Yog tus neeg twg nco ntsoov txog lo lus no, mas nws yuav tsis muaj cuab kav ua txhaum. Vim nyob ntiaj teb no tsis muaj ib yam uas Tswv Ntuj tsis paub thiab tsis pom.