VIM LI CAS LUB CAIJ PLAUB CAUG THIAJ MUAJ PLAUB CAUG HNUB

Peb cov neeg ntseeg Kav Tos Liv paub tias lub caij no yog lub Caij Plaub Caug, tab sis vim li cas peb thiaj hu ua lub Caij Plaub Caug ? Feem coob yuav paub tias lub caij no yog caij txais tshauv, lub caij txais tshauv kuj yog lub Caij Plaub Caug ntag. Nyob hauv lub Caij Plaub Caug muaj 40 hnub sib law, thiab muaj lub ntsiab tseem ceeb los ntawm 40 hnub, yam li ntuj los nag 40 hnub 40 hmo thaum lub caij Nos Has khiav mus nkaum nyob hauv lub nkoj. Tus Yaj Saub Es Lias mus ko taw 40 hnub 40 hmo, kom txog saum Tswv Ntuj lub roob. 40 hnub uas Mais Xes yoo mov nyob ntawm lub roob Xis Nais. 40 hnub uas Huab Tais Yes Xus yoo mov ua ntej nws yuav mus tshaj Tswv Ntuj cov Lus. 40 hnub uas tus Yaj Saub Yos Nas ceeb toom rau cov Nis Nis Vas kom lawv tig los yuav lub siab tshiab, thiab 40 xyoo uas cov His Xas Lais hla teb chaws suab puam. Vim li ntawd, nyob hauv lub caij txais tshauv lub Koom Txoos thiaj xaiv tus zauv 40 los ua lub Caij Plaub Caug, kom cov neeg ntseeg tau koom nrog Huab Tais Yes Xus nyob hauv txoj kev txom nyem thiab txoj kev sawv rov qab los. 
Tus sua : Lis Maib, Zoo Tswv Zov Yaj