TSHEM DAIM TXIAG ZEB THIAJ TAU TXOJ SIA TSHIAB

hnub chiv tim 29 lub 3 hlis tas los no, Vaj Qhia Fas Ntshis Kus ntuas sawv daws kom tshem daim txiag zeb nyob hauv sawv daws lub siab pov tseg, thiab muab Tswv Ntuj Lus los cawm txoj sia hauv txoj kev tuag.
Nyob rau lis piam 5 hauv Caij Plaub Caug no, Ntawv Moo Zoo hais txog Las Ntxas Los kev sawv rov los. Yog li Vaj Qhia thiaj tau muab qhov no los ua lo lus ntuas sawv daws.
Vaj Qhia pib hais tias Mas Tas thiab Mab Liab nkawd tag kev vam khom vim nkawd tus nus tau tag sim neej lawm. Nkawd hais tias : Huab Tais! Yog koj nyob ntawm no, tej zaum wb tus nus yuav tsis tuag.
Huab Tais Yes Xus so nkawd kua muag thiab tsa Las Ntxas Los sawv hauv lub qhov ntxa rov qab los.
Vaj Qhia hais tias nyob hauv peb lub neej mas peb yuav pom tias Huab Tais Ntuj yog txoj sia thiab pub txoj sia rau peb.
Huab Tais Yes Xus tsis pub kom Las Ntxas Los tuag, tiam sis Huab Tais Yes Xus xav muaj feem xyuam nrog peb qhov kev mob siab, tu siab thaum ib tus neeg txheeb ze peb tau tso lub ntiaj teb no tseg. Tshwj xeeb tshaj plaws, mas yog Huab Tais Yes Xus xav qhia peb tias Tswv Ntuj loj dua txoj kev tuag.
Nyob hauv Ntawv Moo Zoo, peb pom tias tib neeg txoj kev ntseeg thiab lub hwj huam ntawm Huab Tais Tswv Ntuj txoj kev hlub yuav nrhiav kev sib khaub zig ua ke, thiab thaum kawg yeej yuav sib ntsib tau.
Huab Tais Ntuj mloog tus poj niam lo lus ‘yog koj ntxov tuaj txog ntawm no’, Vaj Qhia Fas Ntshis Kus hais tias Huab Tais Yes Xus teb lo lus ntawd tias : Kuv yog txoj kev sawv rov los thiab yog txoj sia. Tus ntseeg txog kuv, nws yuav muaj txoj sia nyob.
Vaj Qhia ntuas sawv daws tias “Nyob hauv txoj kev quaj ntsuag no, peb yuav tsum muaj kev ntseeg tas mus li, txawm tias zoo li kev tuag yeej lawm los xij. Tshem daim txiag zeb hauv peb nruab siab mus! Muab Tswv Ntuj Lus los cawm txoj sia hauv txoj kev tuag mog.”
Hnub no Huab Tais Yes Xus hais kom peb tshem daim txiag zeb ntawd pov tseg. Huab Tais Tswv Ntuj kom peb tshem daim txiag zeb tawm hauv peb siab, ces peb txoj sia yuav rov qab vam tuaj.
Kawg no, Vaj Qhia thov niam Mab Liab pab peb kom muaj lub siab txhawj txog lwm tus xws li Huab Tais Yes Xus. Thov kom peb sawv daws nyob ze nrog cov quaj ntsuag, kom peb tsom txog Huab Tais Tswv Ntuj txoj kev hlub thiab lub siab mos nyoos cawm peb hauv kev tuag rau lawv.
Vam txog : vaticannews.va/en
Tus txais : Muas Lauj, Zoo Tswv Zov Yaj