VIM LI CAS VAJ QHIA FAS NTSHIS KUS THIAJ HAWM NIAM MAB LIAB

Kev ncaj ncees thiab hwm Niam Mab Liab yog qhov uas tsoom neeg ntseeg Kav Tos Liv tsim nyog ua. Yam no muaj nuj nqis heev nyob hauv Vaj Qhia Fas Ntshis Kus lub neej, vim Vaj Qhia nquag hais txoj Saw Mab Liab ib hnub 3 zaug. Txawm li cas kuj xij, kev ncaj ncees thiab hwm Niam Mab Liab ntawm Vaj Qhia Fas Ntshis Kus, mas txawv lwm tus Vaj Qhia. Vaj Qhia Fas Ntshis Kus saib Niam Mab Liab tsis yog Tswv Ntuj Leej Niam xwb, Niam Mab Liab yog tus pub txoj kev ntseeg ruaj khov thiab lub zog loj. Lub caij uas Vaj Qhia Fas Ntshis Kus tseem kawm txuj nyob Zes Mas Nias teb, mas lub caij ntawd Vaj Qhia Fas Ntshis Kus muaj lub npe hu tias : “Hos Nkes Mas Lis Os, Npes Nkos Lis Os”. Vaj Qhia nyiam thiab hwm cov duab lawv sau hais txog Niam Mab Liab tus daws pob caus. Nyob hauv daim duab pom Niam Mab Liab tab tom daws ib lub pob caus hlua thiab Niam Mab Liab txhais ko taw tsuj nab lub taub hau. Daim duab no pom tseeb tias : Niam Mab Liab tuaj yeem daws teeb meem thiab nws rhuav tau dab phem txoj kev ntxias. Vim li ntawd, Vaj Qhia Fas Ntshis Kus thiaj nqa daim duab Niam Mab Liab daws pob caus rov mus As Zees Tis Nas teb (Argentina). Tom qab no muaj neeg hwm Niam Mab Liab tus daws pob caus coob leej thiab lawv qhuas kawg. Yog ib tug piv txwv qhia Vaj Qhia kom txawj coj tsoom neeg ntseeg hla txoj kev txom nyem thiab kev kub ntxhov. 
Vaj Qhia Fas Ntshis Kus tseem ntsib cov teeb meem hais txog cov poj niam nyob hauv lub Koom Txoos. Tab sis cov poj niam ua hauj lwm nyob hauv lub Koom Txoos tsis coob pes tsawg, vim lawv tsis tau muaj txoj cai txaus. Cov poj niam feem ntau lawv qhia ntawv rau cov me nyuam, saib cov neeg muaj mob muaj nkees nyob hauv tsev kho mob, saib cov neeg pluag txom nyem thiab ua hauj lwm rau tej pab neeg coob coob. Vim poj niam yeej ua cov hauj lwm zoo li no txij lub hauv paus los lawm. Tom qab Yes Xus tuag lawm, Mab Liab Mas Ntas Las mus tom lub qhov ntxa, nws xav thau Yes Xus lub cev tuag tawm los. Thaum Mab Liab Mas Ntas Las tab tom taug kev mus, mas nws tau ntsib tus neeg zov lub qhov ntxa. Tus neeg zov lub qhov ntxa hais tias : Yes Xus twb sawv rov los lawm. Ces Mab Liab Mas Ntas Las thiaj khiav rov los qhia Yes Xus cov Thwj Tim. Qhov ntawd yog Mab Liab Mas Ntas Las tau coj qhov tseem ceeb ntawm lub Koom Txoos mus qhia rau sawv daws. Yog Mab Liab Mas Ntas Las tshaj Tswv Ntuj txoj kev hlub thiab txoj kev cawm nyob hauv Yes Xus.