TUS PEJ XEEM ZOO

Vaj Qhia Fas Ntshis Kus nqua hu tsoom ntseeg sawv daws kom muaj lub siab dawb paug los ua txoj hauj lwm txhawb nqa thiab tiv thaiv tib neeg lub meej mom nyob hauv zim txwv no.

Tim 18 lub 10 hli 2020, cov ntseeg tuaj sib koom thov Ntuj thiab mloog Vaj Qhia li lus nyob hauv lub tshav hwm Leej Ntshiab Pob Zeb. Vaj Qhia tau nthuav Mas Tais ntawv Moo Zoo (MT 22 : 15-21) tias Huab Tais Yes Xus qhia meej txog kev kav teb chaws thiab kev ntseeg, thiab cov ntseeg txoj hau kev.

Ntawv Moo Zoo hais tias cov Fas Lis Xais nrhiav kev kom Huab Tais Yes Xus, lawv thiaj nug tias puas them se rau Xes Ntxas.

Nyob hauv teb chaws Yus Das, lawv raug cov Los Mas kav tab sis lawv tsis kam zwm rau tus vaj Los Mas vim Los Mas txoj cai tsis haum rau lawv txoj kev teev hawm. Lawv saib tias tus vaj daim duab saum lub nyiaj yog ib yam thuam lawv tus Tswv Ntuj.

Vaj Qhia hais tias Huab Tais Yes Xus paub zoo txog cov Fas Lis Xais lub siab phem, lawv cuab ntxiab rau Huab Tais Yes Xus kom teb lawv tias ‘Yog’ thiab ‘Tsis yog’. Tab sis Huab Tais Yes Xus tsis teb lawv, nws rov ntuas lawv tias yam twg yog Xes Ntxas li mas rov muab rau Xes Ntxas; yam twg yog Tswv Ntuj li mas muab rau Tswv Ntuj.

Huab Tais Yes Xus cov lus no yog nws txav tawm hauv txoj kev sib cav sib ceg : Tsum them se rau Xes Ntxas, tab sis kom lawv ras ntsoov tias nyob hauv lawv mas muaj Tswv Ntuj daim duab nyob, yog li lawv sawv daws thiaj yog Tswv Ntuj tug; lawv tsum them rov qab rau Tswv Ntuj.

“Huab Tais Yes Xus lo lus no qhia peb kom zwm rau txoj cai lij choj thiab txoj kev teev hawm; yog ib txoj hau kev meej tseeb rau peb cov ntseeg taug nyob hauv zim txwv no.” Vaj Qhia ntuas.

Pej xeem tsum them se thiab ua raws tseem hwv txoj cai, cov ntseeg tsum ua tim khawv tias lawv hwm lawv tus Tswv Ntuj nyob hauv lawv txoj sia.

Cov neeg ntseeg raug hu los ua Tswv Ntuj haiv neeg nyob hav lub Cim Ntxuas, mas lawv kev ua neej nyob hauv lub sawm fem; lawv yuav muab lub Moo Zoo los txhawb lawv lub siab thiab kom Leej Ntuj Plig Ntshiab los nyob hauv lawv txoj sia.

Vaj Qhia nqua hu sawv daws kom xyaum ua tus neeg txhob khav theeb tiam sis muaj cuab kav pab txhim kev huam vam rau txoj kev sib nyiam sib hlub.

Kawg no Vaj Qhia hais kom sawv daws thov niam Mab Liab pab kom sawv daws muaj lub siab ua ib tug pej xeem zoo, “Peb thov niam Mab Liab pab peb kom dim hauv kev ua neeg siab nkaus, thiab pab peb ua ib tug pej xeem zoo rau peb lub teb chaws. Thov niam Mab Liab pab txhawb peb kom muaj siab ua tim khawv tias peb muaj Tswv Ntuj nyob hauv peb, peb muab Tswv Ntuj ua qhov nruab nrab hauv peb txoj sia.”