TXHOB HNOV QAB KEV XYIV FAB

Hauv Hub Chiv tim 13 lub 12 hlis 2020, Vaj Qhia Fas Ntshis Kus hais txog Zam Ntxuav Plig tias yog tus ntaus thawj hauv lub zim txawv ntawd, yog tus ua neej nyob hauv kev vam khom thiab xyiv fab tos txais tus Pleev yuav tuaj, nws tsis quav ntsej txog nws tab sis nws npaj siab tos txais Leej Pleev tus kaj ntiaj teb neeg.

Lub Caij Tos Huab Tais, mas peb cov ntseeg zoo siab xyiv fab xws li tus tib neeg tos nws tus hlub rov los. Vaj Qhia hais rau ib zeej tsoom tias “Nyob hauv Lis Piam Peb hauv Caij Tos Huab Tais mas yog lub lis piam peb yuav xyiv fab li tus Hauv Paus Xa Lus hais tias nej yuav xyiv fab tsis tseg.”

Ua cas peb thiaj yuav xyiv fab? Vaj Qhia hais tias vim peb tau nyob ze peb tus Tswv Ntuj, yim nyob ze mas peb yim zoo siab xyiv fab.

Hauv ntawv Moo Zoo mas peb pom tias Zam yog ib tug tau ua tim khawv txog Yes Xus: Zam yog ib tug muaj suab npe nyob rau lub ziv txwv ntawd, tiam sis nws tsis saib tias nws yog tus neeg nto npe;  Zam hais tias nws tuaj npaj Huab Tais txoj kev, nws tsis tsim nyog daws tus yuav tuaj tom qab txoj hlua khau.

Vaj Qhia rov ntuas sawv daws tias peb yuav xyiv fab tau mas peb tsum txhob saib peb loj dua txhua tus, tiam sis peb tsum saib Huab Tais Yes Xus ua lub plawv hauv peb vim Huab Tais Yes Xus yog txoj kev kaj rau lub ntiaj teb.

Zam tuaj ua tim khawv txog Huab Tais Yes Xus, Zam tso txhua yam hauv nws lub neej pov tseg, nws xaiv Huab Tais Tswv Ntuj ua ntej, nws mloog Tswv Ntuj lus tas siab tas ntsws tas nws lub tswv yim. Li ntawd, Zam thiaj tso tas txhua yam kom nws tau kev twj lij npaj Tswv Ntuj txoj kev.

Vaj Qhia Fas Ntshis Kus hais tias peb sawv daws yuav yoog tsis tau Zam tus yam ntxwv, tab sis xav kom peb pom tias tus neeg nrhiav qhov tseeb hauv txoj sia mas nws yuav ntsib kev xyiv fab mus li.

“Zam ua piv txwv rau peb tias tus neeg tshaj Tswv Ntuj Lo Lus tsum tso ntiaj teb kev ntshaw pov tseg, nws yuav tau tig los coj ntiaj teb neeg los paub Huab Tais Yes Xus.”