LUB CAIJ YES XUS YUG YOG LUB SIJ HAWM RAU PEB TAU PAB LWM TUS

Hnub Chiv hauv Lis Piam 4 Caij Tos Huab Tais, Vaj Qhia Fas Ntshis Kus tau nthuav Lus Kas Ntawv Moo Zoo (LK1:26-38) rau cov ntseeg sawv daws uas tuaj sib sau nyob hauv lub tshav puam hwm Leej Ntshiab Pob Zeb tias Mab Liab raug hu los ua Leej Pleev Leej Niam mas yog ib qhov kev xyiv fab thiab yog kev sim loj tshaj.

Raws li Ntawv Moo Zoo sau cia mas lawv muab Mab Liab qhaib rau Yos Xes lawm, yog tias tus ntxhais twg daws cev ua ntej nws muaj cuab mas nws yuav raug lub txim loj. Li ntawd, thaum Mab Liab tau txais xov ntawm tus Tshiab Nkas Nplias, mas Mab Liab muaj ib siab pom kev kaj thiab ib siab xav tsis thoob vim tias yog nws txais ua Tswv Ntuj leej niam mas nws yuav ua neej tsis xws luag tej mus li.

Vaj Qhia hais ntxiv tias Mab Liab txaus siab txais Tswv Ntuj Leej Tub los xeeb nyob hauv nws, Mab Liab hais tias  ‘kom muaj raws li koj hais.’

Mab Liab lo lus no yog nws txaus siab muab nws txoj sia khi rau Tswv Ntuj vim nws nyiam thiab zoo siab tsob hwb nws tus Huab Tais. Mab Liab tsis ua xyem xyav los yog kom Tswv Ntuj ua raws Mab Liab siab xav tau.

Vaj Qhia rov ntuas sawv daws tias peb sawv daws nyiam laug caij laug nyoog, tsis hais sab cev nqaij los sab ntsuj plig. Xws li peb pheej hais tias tsis muaj sij hawm thov Ntuj. Los yog peb twb paub tias kev pab lwm tus yog qhov tseem ceeb thiab muaj qab hau, tab sis peb kuj pheej hais tias tag kis mam nqes tes pab.

Li ntawd, nyob hauv Caij Yes Xus Yug no, Vaj Qhia thiaj thov caw cov ntseeg sawv daws tig los pab lwm tus.

“Peb ua lwm yam pab cov neeg muaj tsawg dua peb thiab txom nyem dua peb, tsis yog pheej niaj hnub yws yws tias vim tus sab foob sib kis li no ces kuv ua hauj lwm pab luag tej tsis tau.”

Vaj Qhia hais ntxiv tias kev ntshaw noj ntshaw haus ua rau peb tsis ras txog lub Caij Yes Xus Yug Los, tab sis yim neeg ntshiab hauv Npes Les Hes qhia peb tias lawv xaiv kev txom nyem thiab kev nyiam ua ntej.

Kawg no Vaj Qhia Fas Ntshis Kus thov kom sawv daws npaj lub siab lub cev kom huv tos txais Yes Xus yug los.

“Txiv thov caw nej sawv daws npaj tus kheej tos txais tus me nyuam yuav yug los xws li Mab Liab npaj nws kom ntshiab huv tos txais Tswv Ntuj.”