TSWV NTUJ HLUB PEB HAUV PEB TXOJ KEV QAUG ZOG

Hnub Chiv tim 3 lub 1 hlis xyoo 2021 no Vaj Qhia ntuas cov ntseeg sawv daws kom txais Tswv Ntuj los nyob hauv lawv lub tsev, hauv lawv yim neeg, kom lawv tau cev lawv txoj kev qaug zog thiab kev ntshai rau Tswv Ntuj, kom Tswv Ntuj tau hloov lawv lub neej.

Vaj Qhia Fas Ntshis Kus nthuav lub ntsiab hauv Zam Ntawv Moo Zoo (Z1:1) txog tus me nyuam Yes Xus pw hauv lub dab nyuj tias Huab Tais Yes Xus yeej nyob txawm puag thaum lub hauv paus los lawm. Tus Hauv Paus Xa Lus Zam sau tias ‘Txoj sia xeeb txawm nyob hauv nws. Txoj sia yog neeg qhov pom kev.’ (Z1:4)

Zam hu Huab Tais Yes Xus ua ‘Los Nkos’ los yog ‘Leej Lo Lus’, mas yog vim lo lus yog xwm siv sib tham. Vaj Qhia nthuav tias tsis muaj leej twg yuav hais lus tib leeg xwb, tus hais lus nws tsum hais rau lwm tus mloog.

Vim li ntawd, Vaj QHhia thiaj nthuav Zam lub ntsiab hais tias Huab Tais Yes Xus yog Leej Lo Lus ib txwm nyob txawm thaum lub hauv paus no tias thaum chiv lub keeb huam yuaj los, Tswv Ntuj yeej xav nrog peb sib tham, xav muab lus rau peb lawm.

Tswv Ntuj xav qhia peb txog qhov zoo nkauj hauv kev ua Tswv Ntuj ib tug me nyuam, Tswv Ntuj xav tshem kev txhaum qhov tsaus ntuj tawm hauv peb mus, Tswv Ntuj yog txoj sia paub peb kev ua neej thiab Tswv Ntuj xav hais rau peb tias nws nyiam peb hlub peb tas txwv los.

“Huab Tais Yes Xus yog Tswv Ntuj Leej Lo Lus nyob ib txhis, yog tus nco ntsoov txog peb thiab xav txuas lus nrog peb tas mus li.” Vaj Qhia ntuas ib zeej tsoom.

Vaj Qhia hais ntxiv tias Ntawv Moo Zoo hauv hnub no qhia peb tias Huab Tais Yes Xus mus deb dua lo lus lawm, vim Leej Los Lus yog peb lub cev thiab nyob txawm hauv peb.

Zam siv lo tias ‘lub cev’, mas yog nws xav hais txog neeg qhov tsis muaj zog, neeg nyob hauv kev qaug zog.

Tswv Ntuj xav paub neeg, mas nws thiaj xeeb ua tib neeg kom muaj lub cev muaj daim nqaij. Huab Tais Yes Xus cov qhov txhab thiaj yog qhib Tswv Ntuj lub siab muag rau peb. Huab Tais Yes Xus thov Ntuj tsis tseg rau peb. Txij thaum Tswv Ntuj xeeb ua lub cev, ces peb thiaj muaj cuab kav cev txhua yam rau Tswv Ntuj.

“Cov kwv tij zoo nyiam, Tswv Ntuj xeeb ua lub cev kom nej sawv daws to taub tias Tswv Ntuj nyiam nej npaum cas, thaum nej qaug zog mas Tswv Ntuj nrog nej nyob, tsuas yog nej paub txaj muag thiab tu siab tiag tiag.”

Tswv Ntuj tsis zoo li tej ris tsho uas neeg hnav tas ces muab hle pov tseg, Tswv Ntuj nyob txawm hauv neeg lub cev thiab yuav nyob li ntawd mus li. Raws li Ntawv Moo Zoo sau tseg tias ‘Nws nrog peb nyob’.

Yog li Tswv Ntuj xav tau dab tsi ntawm peb? Tswv Ntuj xav tau kev sib khuab zig zoo. Tswv Ntuj xav kom peb koom nrog nws xyiv fab thiab cev peb kev tu siab rau nws; tsis hais kev ntshaw los kev ntshai, kev vam khom los kev ntxhov siab, tib neeg los tej xwv txheej.

Vaj Qhia thov kom cov ntseeg sawv daws nco ntsoov qhib siab txais Tswv Ntuj los nyob hauv lawv txoj sia thiab niaj hnub cev lus rau Tswv Ntuj nyob hauv kev nyob ntsiag to ces Tswv Ntuj yuav los hloov lawv txoj sia tshiab.

Nyob hauv caij tos xyoo tshiab no mas Vaj Qhia thiaj xav kom sawv daws sib koom tes ua txoj hauj lwm pab lwm tus nyob huav Tswv Ntuj, kom sawv daws saib cov neeg qaug zog thiab cov neeg nyob hauv txoj kev raug cai ua qhov loj dua lwm yam.

“Tsis paub tias xyoo 2021 no peb yuav ntsib dab tsi, tab sis muaj ib yam peb paub thiab peb ua tau, yam ntawd yog peb kub siab sib pab sib txhawb thiab txhim peb lub tsev ua ke.”