YUAV NYIAM TSWV NTUJ TAS SIAB TAS NTSWS, THIAB NYIAM LUAG TEJ IB YAM LI KOJ NYIAM KOJ

Hnub tim 3-5 lub 2 hlis xyoo 2019 no, Vaj Qhia Fas Ntshis Kus tau mus koom lub rooj sab laj thiab nrog tus vaj As Xas kav Xis Lias teb sib cog lus hais txog ua kom tib neeg tau nyob ua ke thiab nyob thaj yeeb. Lub rooj sab laj yog tsa nyob hauv lub nroog As Npus Das Npim (Abu Dhabi) nyob hauv cov teb chaws As Las (United Arab Emirates). Muaj ib nqe lus Vaj Qhia hais tias : tsis muaj ib txoj kev teev hawm twg, uas yuav hais tias kev siv dag siv zog yog vim kev cheem tsum. Vaj Qhia tuaj ntawm no, yog tuaj li ib tug neeg ncaj ncees thiab tshaib nqhis txog kev thaj yeeb. Kev tuaj ntawm no, yog xav ua kom kev thaj yeeb tshwm sim, txhawb nqa kev thaj yeeb thiab ua ib yam toob xib ntawm kev thaj yeeb. Vaj Qhia tau hais meej meej txog lo lus tias : kwv tij phooj ywg, kom peb ua dab tsi txhob ua ywj peb siab thiab tsis yuav leej twg hais, peb txhob muab peb saib loj dua luag tej los sis lwm pab lwm pawg. Tus ntseeg thiab ncaj ncees rau nws txoj kev teev hawm, yog tus nyiam Tswv Ntuj tas siab tas ntsws thiab nyiam luag tej ib yam li nws nyiam nws. Cov neeg ntseeg yuav zam kev tsis ncaj ncees thiab txhob ua txhaum, txhob txiav txim rau lwm tus tias yog neeg phem los sis yeeb ncuab. Kev twj lij ntawm cov kev teev hawm, mas nws nyob siab dua tej kev yus pe hawm thiab kev saib luag tej xws li yus cov kwv tij sib haum xeeb. Kev twj lij ntawm cov kev teev hawm uas kom yus nrog lwm tus neeg sib fim hauv lub siab tuaj thiab yog ib yam cheem tsum yuav tsum ua mus rau yav tom ntej. Vaj Qhia hais ntxiv tias : tsis muaj lwm txoj hau kev lawm, peb yuav sib koom ua lub neej tshiab rau yav tom ntej, los peb tsis xav tau lub neej tshiab. Txhua txoj kev teev hawm yuav sib tuam choj sib fim nrog cov neeg ntseeg thiab lawv tej kab lis kev cai. Txoj sij hawm lawm, uas peb tsim nyog muab qhov tseeb los nyob hauv txoj kev sib hais haum, kom peb tau ua lub neej nyob hauv txoj kev cia siab thiab thaj yeeb tiag rau yav tom ntej. Cov neeg ntseeg uas muaj txoj kev teev hawm sib txawv, sawv daws thiaj tau nyob ua ke kaj siab lug. Vaj Qhia lo lus xaus, mas yog thov kom kev sib ntaus rog hauv cov teb chaws xws li : Xis Lias teb, Yees Mees teb, Is Lav teb thiab Lis Npias teb nyob tiaj tus. Kom kev thaj yeeb nyob ntiaj teb nyob tiaj tus xws li cov nqe lus no :

• Ntseeg tias txoj kev ntseeg tiag yuav pab kom peb nyob ruaj nreb hauv kev thaj yeeb.
• Txhua txhua tus neeg nyob hauv ntiaj teb no, muaj cai muaj kev twj lij.
• Kev ncaj ncees yog ib feem ntawm kev khuv leej, yog txoj kev uas tib neeg yuav taug thiab ua nyob hauv lub neej, txhua tus neeg tsim nyog tau txais.
• Kev nkag siab thiab kev txhawb nqa kab lis kev cai kom txhob muaj kev sib caij tsuj, lees txais lwm tus thiab ua lub neej sib haum xeeb nyob tiaj tus, yog tus yawm sij ntawm kev kub ntxhov thiab txhua yam teeb meem uas tib neeg tab tom raug.
• Kev sib haum xeeb ntawm cov kev teev hawm uas sib txawv, yog kev ua lub neej sab ntsuj plig nyob ntiaj teb no. Peb yuav sib faib tej yam muaj nqis thiab xa mus rau lwm cov kev teev hawm, peb yuav tsis ua kom sib tawg thiab muaj yam tsis zoo.
• Kev sib pab txuag txhua yam xws li : cov His Xas Lais tej tsev teev hawm, cov neeg ntseeg tej tsev teev Ntuj thiab cov Mawv Xis Lim cov tsev teev hawm. Txhua yam no yog cov neeg teev hawm lub luag hauj lwm ntawm kev ua neeg nyob ntiaj teb no.
• Kev pab txuag thiab saib xyuas cov me nyuam, kom lawv tau loj hlob nyob hauv lub neej sov siab. Tau txais txhiam xws noj, tau txais kev kawm thiab kev txhawb nqa ntawm tsev neeg.
• Kev saib xyuas cov neeg laus, cov neeg tsis muaj zog, cov neeg raug caij tsuj, yog qhov tsim nyog ntawm cov kev teev hawm yuav tsum saib xyuas.

As Npus Das Npim, yog lub tuam nroog loj tim 2 nyob hauv cov teb chaws Emirates nqes los ntawm lub nroog Dus Npais. Xyoo 2016, lub nroog As Npus Das Npim muaj neeg nyob coob li ntawm 1 plhom 800 txhiab leej. As Npus Das Npim yog lub nroog tim 3 nyob hauv cov teb chaws Emirates uas txhua yam kim tshaj plaws, thiab yog lub teb chaws uas txhua yam kim tshaj plaws tim 26 nyob thoob ntiaj teb.