NTHUAV NTAWV MOO ZOO HNUB TIM 15/11/2019

LK 17 : 26-37

Neej Leej Tub Lub Zim Txwv.

26 Tej xwm uas yuav tshwm sim thaum txog Neeg Leej Tub lub zim txwv, mas yuav zoo xws li tej xwm tshwm hauv Nom Hes lub zim txwv. 27 Sawv daws noj, sawv daws haus, sawv daws yuav poj niam thiab muab tej ntxhais pub tshoob, mus txog hnub uas Nos Hes chaws mus rau hauv lub nkoj, ces dej tuaj nyab, ua kom sawv daws tuag tas. 28 Thiab tseem yuav zoo li lub zim txwv uas Los ua neej nyob : Sawv daws noj haus, sawv daws muas thiab muag cuab yeej, cog qoob loo, thiab txhim vaj tse. 29 Tab sis hnub uas Los tawm plaws khiav ntawm Xos Dos Mas, ces hluav taws thiab leej faj poob saum ntuj los ua sawv daws tuag tas huv si. 30 Hnub uas Neeg Leej Tub yuav tawm los rau pom kuj yuav zoo li ntawd thiab.

31 Hnub ntawd, tus uas nyob saum sam thiaj, tab sis nws cov cuab yeej nyob hauv tsev, mas nws yuav tsis txhob nqes mus nqa. Tus nyob tom teb kuj ib yam, nws yuav tsis txhob tig rov tom qab. 32 Nej nco ntsoov txog Los tus poj niam. 33 Leej twg nrhiav kev txuag nws txoj sia, mas nws yuav plam nws txoj sia. Hos leej twg plam nws txoj sia, mas nws txoj sia yuav ciaj. 34 Kuv hais rau nej : Hmo ntawd, ob leeg pw ib txag : yuav coj ib tug mus, tseg ib tug. 35 Ob tug poj niam ua ke zom zeb : Yuav coj ib tug mus, tseg ib tug." [36...] 37 Ces cov thwj tim qhib ncauj hais rau Yes Xus tias : “Coj mus qhov twg, Huab Tais ?" Yes Xus hais rau lawv tias : "Lub cev tuag nyob qhov twg, dav noj nyuj kuj yuav sib sau ntsauv nyob ntawd."

Kwv tij sawv daws, nyob rau hauv peb lub neej peb tau ntsib xwm txheej ntau tsav yam, muaj qee yam ua rau peb tau qaug tau ntog, muaj qee yam ua rau peb yuav kev. Tej yam ntawd, tshwm sim tuaj zoo li lub caij dej nyab ntiaj teb uas nyob rau hauv Nos Hes tiam neeg. Vim neeg tsis nco ceev faj tias dej yuav nyab taus lub ntiaj teb. Los yog nyob rau hauv Los tiam neeg uas cov hluav taws poob saum Ntuj los hlawv lub nroog Xos Dos Mas, yeej tsis muaj Leej twg nco ceev faj txog li. Tab txawm muaj tus los hais tias, tej yam xwm txheej no yuav tshwm sim tuaj sai sai, tsis kav, yeej tsis muaj tus ntseeg li.

Txawm li cas los xij cov dab neeg los yog cov kwv huam no, qhia rau peb pom tias, neeg ntiaj teb feem coob tsuas xav txog kev ua neej nyob ntiaj teb no xwb. Lawv tsis xav txog qhov tom ntej uas yuav tshwm sim tuaj, lawv tsis xav lees paub tej xwm txheej ntawd. Lawv tsis quav ntsej txog Tswv Ntuj cov lus qhia, tsis quav ntsej txog tej Xib Hwb tej lus ntuas. Ces qhov kawg lawv thiaj raug kev piam sij, lawv nrhiav tsis tau kev dim.

Peb cov neeg ntseeg sawv daws, thov kom peb txhob tsaug zog nyob rau hauv kev ua neej, peb yeej khwv noj khwv haus thiab, tiam sis, peb yuav tsum ceev faj,  peb yuav tsum mloog Tswv Ntuj cov lus qhia, peb yuav tsum txawj mloog Txiv Plig los yog Xib Hwb tej lus txhib peb siab, peb yuav tsum txawj coj peb lub neej kom zoo, kom mus raws li Tswv Ntuj cov lus qhia. Peb yuav tsum ua lub neej npuab Tswv Ntuj mus li, mas qhov kawg, peb thiaj yuav txuag tau peb tus ntsuj plig kom dim. 

Tus sau : Zoo Tswv Zov Yaj