HUAB CUA NYOB IS NTIAS TEB PHEM DUA NYOB SUAV TEB

Zim txwv no huab cua nyob Is Ntias qaum teb phem heev, ces ua rau ib tsoom neeg tig rov los ntsia huab cua nyob hauv ntau ntau lub nroog nyob thoob As Xias teb. Lub nroog Pej Ceeb uas nyob Suav teb, nto npe tias muaj iab oo thiab huab cua tsis zoo los ntau xyoo. Tab sis muab piv rau tam sim no, mas pom tau tias huab cua nyob Is Ntias teb, Pas Kis Taas teb thiab Npees Las Des teb phem tshaj Suav teb lawm ntau npaug. Hais txog cov nroog uas huab cua phem tshaj plaws nyob As Xias teb, mas lub Koom Haum soj ntsuam huab cua IQ AirVisual nyob Xus Is teb tau soj ntsuam huab cua nyob thoob ntiaj teb, thiab pab neeg Greenpeace hais tias : tam sim no muaj 30 lub nroog uas huab cua phem tshaj plaws. 22 lub nroog yog nyob Is Ntias teb, hos 8 lub nroog nyob Pas Kis Taas teb, Npees Las Des teb thiab Suav teb. Tab sis nyob hauv cov nroog uas huab cua phem ntawd, tsis muaj lub nroog Pej Ceeb xyaw, vim lub nroog Pej Ceeb yog lub nroog huab cua phem tim 122 nyob thoob ntiaj teb. Raws kev soj ntsuam huab cua nyob thoob ntiaj teb, mas pom tias cov nroog nyob As Xias teb yog thawj cov nroog uas muaj huab cua phem tshaj. Thawj 3 lub nroog uas muaj huab cua phem, mas yog lub nroog Nyus Des Lis (New Delhi) nyob Is Ntias teb, lub nroog Dhas Kas (Dhaka) nyob Npees Las Des teb thiab lub nroog Khas Npus (Khabul) uas nyob As Kas Nis Taas teb. Hos hais txog ntawm cov teb chaws uas muaj huab cua phem tshaj, mas yog Npees Las Des teb, Pas Kis Taas teb thiab Is Ntias teb. Thaib teb yog lub teb chaws huab cua phem tim 23.

Vim li cas huab cua nyob Is Ntias teb thiaj phem dua Suav teb ? Yog vim Is Ntias teb muaj kev hlawv teb hlawv pob ntoos npaj cog qoob loo ntau dua Suav teb. Thiab kev hlawv teb feem ntau yog nyob rau lub caij nplooj ntoos zeeg. Vim li ntawd, huab cua nyob Is Ntias teb thiaj phem tshaj huab cua nyob Suav teb. Cov huab cua phem no, muaj peev xwm ua rau tib neeg muaj mob ntau yam thiab raug xwv txheej tau.

Tus txhais : Lis Maib, Zoo Tswv Zov Yaj