“Thaum kuv pom Vaj Qhia caij tsheb los hauv lub tshav ncaws pob, mas kuv zoo siab hom khaj heev; kuv ib ce zoo li tuag tas, hais tsis taus ib lo lus thiab kua muag teev puv ub lub qhov muag!” Cim hais txog nws kev zoo siab “Kuv tab tom koom nrog tsoom ntseeg hauv Thaib teb tsim ib zaj liv xwm puas yog?”
Cim hais tias qhov xwm txheej no yog ib qho loj tshaj plaws nyob hauv nws lub neej, qhov xwm txheej no pab txhawb txoj kev teev hawm Kav Tos Liv; tsis hais kev ntseeg, kev tso siab thiab kev vam khom txog Tswv Ntuj. Tsis tas li xwb, peb yuav pom Vaj Qhia txoj kev tsis muab hlob thiab khuv leej rau lwm tus. “Vaj Qhia tus yam ntxwv no pab txhawb kuv txoj kev ua zoo rau lwm tus, pab txhawb kom kuv kub siab coj lub Moo Zoo mus cuag lwm tus.”
Dhau ntawm kev zoo siab tau pom Vaj Qhia lawm, Cim txawm hais tias muaj ib yam ntxim nws siab heev, mas yog nws pom cov kwv tij ntseeg Kav Tos Liv ntau haiv neeg, ntau xeem lus, ntau txhia chaw tuaj sib koom siab nyob ua ke. Txawm tias sawv daws tos puag thaum sawv ntxov txog hnub poob qho, los sawv daws zoo siab luag ntxhi, kev hom khaj nyob puv sawv daws siab ntsws; vim lawv sib koom nyob hauv Huab Tais Yes Xus lub cev, lawv koom tib txoj kev ntseeg yog ntseeg txog Leej Txiv, peb tus Huab Tais Tswv Ntuj siab zoo.
Kawg no Cim kub tsis nco qab ua tsaug Tswv Ntuj uas tau coj nws tuaj nyob ntawm no, ua tsaug nws tus Txiv Plig uas xaiv nws tuaj zaum no, ua tsaug cov kwv tij sawv daws uas tau coj nws daim ntawv hla qhov rooj tuaj cuag nws tes.
Tus sau : Cim Yaj
Add new comment