TXOJ SIA TSHIAB NYOB HAUV CAIJ YES XUS YUG LOS

“Tshuav ib lis piam xwb ces twb txog Caij Yes Xus Yug Los lawm” Vaj Qhia Fas Ntshis Kus pib hais rau sawv daws, “Nej tab tom npaj tus kheej zoo li cas lawm.”
Vaj Qhia hais tias nyob hauv nws tus kheej, mas nws npaj lub dab zaub nyuj; nws hais tias “Txiv mus rau Nkes Xis Os, qhov chaw uas Leej Ntshiab Fas Ntshis Kus Xas Vis Yes txhim thawj lub dab zaub, thiab Txiv sau tsab ntawv piav txog qhov kab ke no xa mus rau cov neeg nyob hauv.”
Vaj Qhia nthuav rau sawv daws paub tias lub dab zaub nyuj ntawd yog lub Moo Zoo muaj txoj sia uas coj lub Moo Zoo tuaj rau cov thaj tsam hauv peb lub neej : yog hauv peb tsev nyob, hauv peb tsev kawm ntawv, hauv peb chaw ua hauj lwm, hauv peb zej zos, hauv peb cov tsev kho mob, hauv cov tsev loj faj thiab rau hauv cov tuam tsev.
 Vaj Qhia hais tias tej ntawd yog txoj hau kev Tswv Ntuj coj nws kev nyiam tuaj yug nyob hauv peb. Kev ua dab zaub nyuj no yog tsuj xeeb tias Tswv Ntuj nrog nraim peb thiab pom tias Tswv Ntuj yog qhov tseeb thiab yog txoj sia. Tus me nyuam Yes Xus sab tes tawm hauv lub dab zaub nyuj los, yog qhia peb tias Tswv Ntuj puag peb sawv daws cia nyob hauv nws.
Vaj Qhias Fas Ntshis Kus hais ntxiv tias yog ib yam zoo uas tau sawv nyob ntawm lub dab zaub thiab tau faib txoj kev vam khom thiab kev ntxhov siab nrog Tswv Ntuj txhia hnub.
Vaj Qhia rov hais tias lub dab zaub yog lub Moo Zoo, cov zaub nyuj yog pluas qav peb faib rau cov cuab yim neej thiab yog Yes Xus uas yog cov mov muaj sia nqes saum Ntuj los nyob hauv peb.
Nyob hauv lub neej lom zem rau lub zim txwv no, lub dab zaub txais me nyuam Yes Xus qhia peb kom peb nres me ntsis xav txog yam tseem ceeb hauv peb lub neej.
Nyob hauv lub ntiaj teb muaj kev tsim cuab tam ntaus rog thiab siv zog quab yuam no, lub dab zaub yog daim duab tsom txog kev thaj yeeb; yog li lub dab zaub nyuj thiaj yug lub Moo Zoo muaj sia.
Kawg no, Vaj Qhia Fas Ntshis Kus muab lub tswv yim rau sawv daws mus txua dab zaub rau hauv sawv daws tsev, kom lub me nyuam dab zaub no qhia peb tias Tswv Ntuj los yug ua tib neeg li peb thiab tseem niaj hnub nrog nraim peb.
Lub dab zaub no zoo li yog peb tab tom qhib qhov rooj rau Huab Tais Yes Xus kom nkag los, yog Huab Tais Yes Xus nyob hauv peb, mas peb yuav yug dua tshiab. Yog peb muaj txoj sia tshiab, mas yog nyob hauv Caij Yes Xus Yug Los.

Tus txhais : Muas Lauj, Zoo Tswv Zov Yaj