HLUAV TAWS KUB AUS THAS LIAS TEB

Hluav taws tau kub cov hav zoov nyob Aus Thas Lias teb lawm 8 plhom 400 tawm txhiab hev taj, los yog 52 plhom laij. Cov hav zoov uas kub hnyiab ntawd feem ntau yog hauv zoov laus uas muaj ntau hom tsiaj nyob. Tsoom pej xeem tej vaj tsev raug kub hnyiab yuav luag 2,000 lub. Neeg tuag lawm 26 leej thiab raug mob 3 leeg. Lub xeev New South Wales yog lub xeev uas raug kev piam sij loj tshaj. Cov tsiaj qus nyob hauv hav zoov raug kub hnyiab tuag li ntawm  500 plhom tus. Cov tub ceev xwm ntes tau 183 tus neeg uas lawv muaj feem cuam txog kev hlawv hav zoov zaum no. Hluav taws twb tau kub hnyiab nyob Aus Thas Lias teb txij thaum lub 11 hlis los lawm. 183 tus neeg uas raug cov tub ceev xwm ntes, mas 24 leeg yog raug lub txim tias lawv txhob txwm hlawv hav zoov. Hos 53 leeg yog raug lub txim tias lawv tsis ua raws tseem hwv txoj cai txuag hluav taws qus. 47 leej yog raug lub txim pov tw luam yeeb thiab zeb teeb rau hauv hav zoov. Cov neeg uas raug ntes ntawd muaj 40 leej yog cov tub hluas. Lub txim ntawm kev hlawv hav zoov, mas yuav raug kaw nkuaj 21 xyoos txog 25 xyoos. Yog leej twg rauv taws los sis haus luam yeeb ze hav zoov li 15 mev, tsis hais hlawv quav nplej, quav pob kws, nplooj ntoos qhuav thiab tej ceg xyoob ceg ntoo, mas nws yuav tsum raug npluaj nyiaj 5,500 dos las.
Tswv Ntuj tau tsim kom muaj lub ntuj ntsuab thiab nroj tsuag xyoob ntoo rau neeg uas tus kav, tab sis neeg tsis txawj kav. Lub hauv paus Tswv Ntuj hais tias :
“Xav kom lub ntiaj teb tuaj nroj tsuag ntsuab xiab, kom muaj nroj tsuag txawj muaj noob, thiab kom muaj ntoo txi txiv nyias txiv nyias hom txiv, nyias muaj nyias hom noob. Lub ntiaj teb thiaj tuaj nroj tsuag ntsuab xiab, tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob.” (HP 1 : 11 – 12)
Lub ntiaj teb yuav ntsuab xiab thiab zoo nkauj, yog vim muaj xyoob ntoo hav zoov thiab nroj tsuag. Phim tib neeg yuav txuag yam Tswv Ntuj tsim rau neeg kom nyob nrog lub ntiaj teb ntxiv mus. Vim li ntawd, Vaj Qhia thiaj nqua hu kom tas ib tsoom neeg nyob ntiaj teb sib pab txuag hav zoov. Thiab tso tseg kev hlawv pa roj a kom lub ntuj txhob kub thiab av txhob qhuav, ces tib neeg thiaj yuav muaj dej haus thiab nyob nrog cov huab cua ntshiab huv.

Tus txhais : Lis Maib, Zoo Tswv Zov Yaj