Tsa tus kheej los tos Huab Tais

Nyob hauv Hnub Chiv thawj lub Lis Piam caij Tos Huab Tais xyoo no, Vaj Qhia Fas Nshis Kus nqua hu sawv daws kom ‘sawv hauv dab ntub’ thiab faj txog Tswv Ntuj tus nyob mus li thiab txais Tswv Ntuj los nyob hauv peb lub neej.

Hnub tim 27 lub 11 hlis 2022 yog ncaj rau Hnub Chiv thawj lub Lis Piam caij Tos Huab Tais, cov lus nyob hauv Ntawv Moo Zoo yog ntuas sawv daws tias Huab Tais tab tom nqes los nrog peb nyob, nws yog peb txoj kev vam khom tus cag.

Vaj Qhia taw kev rau sawv daws kom pom tias nyob hauv peb txoj sia mas Huab Tais los xyuas peb tas txwv, los coj peb mus nyob ze nws thiab coj peb rov qab mus nyob hauv nws thaum txog lub caij kawg. Tab sis peb pheej nug raws li peb lub tswv yim paub tias Huab Tais los xyuas peb li cas, peb yuav paub thiab tos txais Huab Tais zoo li cas?

Lo lus tim ib uas Vaj Qhia xav kom peb muab siab xav rau yog lo lus peb niaj hnub hnov hais tias niaj hnub Huab Tais nrog peb nyob, saib xyuas peb hauv peb txoj kev. Muaj tej zaus qhov tseeb no kuj ploj mus, xws li thaum peb ua siab fab; los yog thaum peb nrhiav tej lub cim kom tsom tau tias Huab Tais nrog peb nyob.

Yog li mas lub Moo Zoo hnub no thiaj yog ntuas peb sawv daws tias Tswv Ntuj yuav los lub caij peb tsis nco faj xws li Nos Hes tiam neeg. Tswv Ntuj zais ntshis hauv tej xwm tuaj tshwm hauv peb lub neej, thiab peb yuav tau ras txog qhov tseeb no, tsis yog tos tej yam zoo zoo yuav tshwm tuaj tom ntej xwb. Tej zaus yog lub zim txwv peb ntsib cov neeg vam txog kev pab, peb ntsib yam tsis nco ceev faj, los yog thaum peb lub neej nyob ntsiag to los ceeb laj. Thaum ntawd peb yuav ntsib Huab Tais, tus hu peb, hais lus rau peb, thiab tshoj peb kom ua.

Lo lus tim ob yog lo lus tias peb yuav ceev faj cia, zov hmo tsis tseg raws li lo lus Huab Tais Yes Xus hais tias ‘nej yuav ceev faj vim nej tsis paub tias nej tus tswv yuav los thaum twg.

Vaj Qhia hais ntxiv tias “Kuv nco txog Leej Ntshiab Aus Nkus tej lus hais tias ‘Kuv ntshai tus Huab Tais hla dhau mus lawd’…Kuv ntshai tsam nws hla dhau kuv mus, es kuv nco tsis tau nws.”

Vaj Qhia rov piav txog cov lus hauv Ntawv Moo Zoo hais txog cov neeg hauv Nos Hes tiam, lawv noj haus ua lom zem xauv npo mus txog hnub dej muab lawv nyab tuag tas. Peb tsum ntsia kom pom tias Tswv Ntuj nyob hauv peb lub neej thiab peb lub tswv yim yuav tsis plam hauv daim duab loj no thaum peb muaj lub siab fab rau lub ntiaj teb.

Vaj Qhia ntuas sawv daws tias lub caij Tos Huab Tais yog lub zim txwv zoo rau peb nchos peb txoj kev nkees thiab sawv hauv dab ntub los zov hmo. Peb yuav nug peb tias ‘Kuv puas faj seeb thiab sawv zov hmo ne? Kuv puas tau npaj txhij tos tus Huab Tais yuav tuaj no?’

“Peb thov tus Nkauj Ntshiab, tus poj niam tos nrhw Huab Tais, tus paub txog tus Tswv Ntuj tsis muab hlob thiab ua neej zais ntshis nyob hauv Nas Xas Les thiab zoo siab hlo txais Tswv Ntuj los xeeb nyob hauv nws lub cev, pab peb kom txawj tos Huab Tais tus yuav tuaj xws li nws thiab.”

Vam txog: https://www.vaticannews.va/en/pope/news/2022-11/pope-may-advent-awaken-us-to-god-s-presence-in-our-daily-lives.html