VAJ QHIA CEEB TOOM KOM TSHEM VAS TIS KAS TXOJ CAI ZAIS HAIS TXOG KEV QUAB YUAM SIB DEEV

Vaj Qhia hais tias : lub Koom Txoos txoj cai khaws txhua yam thiab zais tsis pub luag tej paub hais txog kev quab yuam sib deev, mas txij no mus yuav tsis muaj lawm. Yav tag dhau los lub Koom Txoos khaws tej yam hais txog kev quab yuam sib deev ntawm tej tus neeg, thiab zais tsis pub nthuav tawm. Yog vim tsis xav kom muaj neeg xyav moo thiab ua rau tus neeg ntawd puas suab npe. Tab sis muaj tej tus neeg hauv lub Koom Txoos siv txoj cai no mus ua tej yam tsis zoo thiab nthuav tawm rau cov tub ceev xwm tsis tau. Vim muaj txoj cai zais li ntawd, mas muaj tej tus neeg ua tej yam tsis zoo, los cov tub ceev xwm tshuaj xwm tsis tau, vim yog muaj txoj cai zais ntawd txuag tus neeg ua phem. Vaj Qhia ceeb toom li no, mas ua rau cov neeg ua hauj lwm nyob hauv rooj pwm tsav Vas Tis Kas (Roman Curia) yuav tsis khaws tej ntaub ntawv thiab tsis zais hais txog kev quab yuam sib deev, cov duab liab qab ntxiv mus lawm. Tab txawm cov neeg raug ua pov thawj, los tus neeg raug quab yuam deev thiab cov neeg kom teeb meem kuj yuav tsis txwv lawv tej lus hais. Yav tag los cov neeg ua pov thawj, cov neeg raug quab yuam thiab cov neeg kom teeb meem rau nom tswv, mas lawv muaj txoj cai txwv tsis pub hais lus ntau. Txij no mus, mas tas cov neeg uas hais los no muaj cai hais lus ywj lawv siab.
Vaj Qhia txib kom cov tub ua hauj lwm nyob hauv Vas Tis Kas ua raws txoj cai thiab pab cov tub txiav txim tshuaj xwm txog cov teeb meem quab yuam sib deev no kom ncaj ncees thiab tsis txhob pub muaj teeb meem. Lub qab xyoos dhau los, lub Koom Txoos Kav Tos Liv raug xyav moo hais txog kev quab yuam sib deev loj kawg los ntawm tej tus Txiv Plig. Ua kev kub ntxhov rau tus neeg tsim teeb meem thiab ib tsoom Txiv Plig nyob thoob ntiaj teb. Vaj Qhia kuj raug coob leej neeg taij thov kom siv Vaj Qhia lub peev xwm los nrhiav kev daws cov teeb meem no thiab. Tas cov thawj coj ntawm lub Koom Txoos nyob Vas Tis Kas kuj pom zoo txog Vaj Qhia cov lus ceeb toom kom tshem txoj cai zais kev phem kev qias no, vim tias yog muab txoj cai zais no tshem mus lawm, mas yuav ua rau txhua yam ntshiab huv thiab ncaj ncees tuaj. Cov tub ceev xwm kev ua hauj lwm los kuj tsis muaj dab tsi khuam, vim cov tub ceev xwm tuaj yeem tshuaj xwm tau txhua yam nyob hauv lub Koom Txoos, tsis muaj txoj cai zais ntawd los txwv lawm.

Tus txhais : Lis Maib, Zoo Tswv Zov Yaj