LUB NEEJ POJ NTSUAM

Nyob zoo ib tsoom niam txiv kwv tij phooj ywg Hmoob sawv daws ! Kuv lub npe hu ua As Nub xeem Lis, kuv hnub nyoog muaj 45  xyoos. Kuv yog nkauj Hmoob xeem Xyooj, tab sis los yuav txiv Hmoob Lis nyob rau hauv lub zos Nav Xais, lub xeev Phiv Xas Nuv Lauj (Phisanulok, nyob Thaib teb.
Zoo siab ntau uas hnub no kuv tau tuaj ntsib nej ib tsoom kwv tij Hmoob sawv daws nyob rau hauv phau ntawv Liaj Luv Xa Moo no. Yav dhau los, kuv tau nyeem phau ntawv Liaj Luv Xa Moo no, pom txog peb tsoom kwv tij Hmoob lub neej, kuj ua rau kuv muaj kev zoo siab. Kuv thiaj xav hais tias : hnub no, kuv yuav los piav ib zaj txog kuv lub neej ntsuag pub rau nej sawv daws tau mloog. Txawm tias tsis zoo dab tsi, los kuv xav tias nws kuj yog zoo li ib zag dab neeg ntawm kuv lub neej. Yog vim muaj coob leeb ntau tus lawv kuj muaj lub neej txom txom nyem ua ntsuag niam ntsuag txiv, los yog ua ntsuag txij ntsuag nkawm zoo li kuv thiab. Hais txog txoj kev ua ntsuag, mas txhob tham xwb, yog tham ces kua muag yuav los. Txawm li cas los xij, vam tias kuv zaj dab neeg no yuav pab txhawb qee leej neeg uas txom txom nyem li kuv, kom muaj zog ua neej ntxiv mus.
Ntawm no, kuv yuav los piav txog kuv lub neej ntsuag txij puag thaum kuv tseem yau los.
Txij li thaum kuv nco tau los, kuv txiv twb tuag lawm, nws tso kuv niam wb nyob ua ntsuag. Kuv yeej nco tsis tau tias kuv txiv lub ntsej muag zoo li cas, thiab loj li cas, siab li cas hlo li. Kuv nrog kuv niam nyob, kuv saib kuv niam zoo cuag li yog kuv lub ntuj, nws ib sab ua niam ib sab ua txiv. Kuv niam tu kuv, nws nrhiav rau kuv noj, tu kuv hlob, nws qhia ib puas tsav yam rau kuv ua neej. Tom qab tsis ntev, kuv niam txawm mus yuav txiv tshiab lawm, nws ho mus yug tau 3 leeg tub ntxiv. Txawm tias kuv muaj txiv tshiab lawm los, yus tsis yog luag yug, ces luag tsis xav hlub, yus yuav tsum khwv yus ib txhia thiaj tau noj. Thaum kuv hnub nyoog muaj 12 xyoos, kuv twb txawj mus ua kuv teb lawm, kuv mus ua teb yeeb, kuv mus kuv ib leeg xwb. Thaum ntej kuv yeej tsis tau luag, tiam sis yog tsis mus ces tsis tau noj, ua ua tom qab kuv kuj ua tau lawm thiab.  
Thaum kuv loj hlob los, kuv los ua kuv lub neej, kuv yuav tau kuv tus txiv, zoo cuag li nws yog lub ntuj tshiab rau kuv. Nws coj kuv ua noj ua haus, kuv kuj muaj kev kaj siab thiab kuv lub neej kuj zoo tuaj lawm ib qib. Wb yug tau 4 tug me nyuam, 2 tug tub 2 tug ntxhais. Tiam sis hmoov tsis muaj, wb ua lub neej los txog rau xyoo 2008, ces kuv tus txiv tau tag sim neej lawm, nws tso peb cov niam tub nyob ua ntsuag. Thaum ntawd, kuv cov me nyuam los kuj tseem yau yau, ces kuv rov ntsib kev txom nyem dua ib zaug ntxiv. Kuv xav tias tshuav kuv ib leeg xwb, xyov kuv yuav ua cas thiaj tu tau lawv hlob, kuv yuav ua cas khwv txaus lawv noj lawv hnav, yuav ua cas nrhiav nyiaj txaus lawv siv thiab xa lawv kawm ntaub kawm ntawv kom tiav ? Qee zaus kuv xav tias cia mus yuav dua txiv tshiab, es pib dua lub neej tshiab, los ntshai tsam luag tsis hlub yus tej me nyuam, ces thiaj txiav txim siab ua ib siab nyob zov cov me nyuam txog niaj hnub no. Kuv ua lawv niam lawv txiv, nrhiav rau lawv noj lawv hnav thiab muab txoj kev txom nyem rau kuv ib leeg ris. Kuv ua tiag nrhiav rau lawv noj lawv haus, tu lawv kom hlob, lawv thiaj tsis pom qab tu siab rau kuv. Tiam sis, kuv yog ib tug poj niam xwb, tsis paub ntaub paub ntawv, tsis txawj tsis ntse li luag tej, khwv npaum cas los tsis txaus tej me nyuam noj, tsis txaus tej me nyuam siv, vim ib hnub lawv loj zuj zus tuaj thiab kev siv nyiaj siv txiaj ntau zuj zus. Lawv txoj kev kawm ntawv kuj siab zus thiab siv nyiaj ntau, ua rau kuv khwv npaum cas los tsis txaus li, txom txom nyem kawg nkaus. Qhov kawg, kuv tus me tub hlob thiaj tau tso nws txoj kev kawm tseg, nws los pab kuv khwv nyiaj xa cov me yau kawm ntawv. Nws nyuam qhuav kawm txog txheej nrab qib 3 xwb, ces twb tawm los ua hauj lwm lawm. Nws ua hauj lwm tau npaj puav nyiaj los, nws kuj muab rau kuv thiab xa rau tej yau tau siv kawm ntawv. Muaj ib zaug, thaum noj tsiab peb caug nws los tsev, nws los ntsib teeb meem. Nws raug luag ntaus sab kawg, ua rau nws tuag ib tsig thiab kuv txhawj nws tshaj plaws. Kuv hlub nws npaum cas, los kuv twb pab tsis tau dab tsi. Thaum ntsib ib rooj plaub ntug zoo li no, ces yus niag poj niam xwb, yus chim thiab mob siab npaum li cas los yus hais tsis tau dab tsi li. Kuj zoo siab qhov uas kuv tus me tub rov qab zoo los lawm, nws nrog kuv nyob, nrog kuv ua dag ua zog thiab khwv nyiaj pab kuv xa 2 tug ntxhais uas tseem tab tom kawm qib siab, nyob rau University hauv tuam ceeb Npaas Koj (Bangkok). Tau 3 lub xyoo tom qab, kuv tus ntxhais hlob thiaj kawm tiav fab saib nyiaj txiag kev lag luam. Tsis ntev, nws kuj nrhiav tau ib txoj hauj lwm nyob rau hauv ib lub tsev tos txais qhua, nyob hauv lub nroog Phuket. Ces peb 3 leeg sib pab nrhiav nyiaj xa 2 tug yau kawm ntawv ntxiv. Lub caij ntawd, kuv tus ntxhais yau tab tom kawm nyob rau tsev ntawv txheej siab xyoo 1, nyob hauv tuam ceeb Npaas Koj. Nws kawm ua ib tug kws kho mob uas yog kho cov neeg tuag tes tuag taw. Hos tus tub ntxawg, tab tom kawm ntawv nyob tsev ntawv txheej nrab qib 3. Thaum cov me nyuam loj tas, lawv pab tau kuv, kuj ua rau kuv lub nra sib tuaj lawm.
Kuv pom tias lawv txawj xav thiab txawj hlub kuv tus ua niam, lawv txawj sib hlub sib pab zoo li no, ces kuv muaj kev kaj siab tuaj lawm ntau.
Los txog rau xyoo 2015 no, kuv tus ntxhais yau kuj tau kawm tiav lawm thiab. Tam sim no, tsuas tshuav kuv tib tug tub ntxawg uas tseem tab tom kawm ntawv nyob rau hauv ib lub tsev kawm txheej siab. Kuj vam thiab cia siab tias tej zaum tsis ntev no, kuv tus tub ntxawg yuav kawm tiav raws siab xav thiab.
Tam sim no, kuv cov me nyuam loj tiav nkauj tiav nraug tas, lawv txawj hlub kuv thiab pab kuv, ces zoo li lub hnub ci rau kuv thiab kuv lub neej rov pom kev tuaj lawm. Kuv xav hais tias kev txom nyem ua neej nyob ntiaj teb no, tsis yog muaj yus ib leeg xwb, thiab tus muaj txoj hmoov phem, kuj tsis yog yus ib leeg xwb. Txawm li cas los xij, yus muab yus txoj kev txom nyem, kev lwj siab lwj plawv tsuj ntiag ntawm ko taw, ces yus kav tsij rau siab ntso ua yus lub neej ntxiv mus, yus los hlub yus tsev neeg, hlub yus tej me tub me nyuam, yus siv zog pab txhawb yus tej me tub me nyuam, kom lawv muaj lub neej zoo, ces muaj ib hnub yus yeej yuav ntsib kev kaj siab xwb.
Kwv tij Hmoob sawv daws ! Kuv tsuas piav kuv zaj dab neeg los xaus li no xwb, yog yuav piav kom ntxaws, mas ntshai tsam phau ntawv no tsis txaus piav, ces tsuas lam sau dog dig li no rau nej tau saib tau nyeem xwb. Txawm tias kuv sau tau tsis zoo, los sau tsis yog, kuj thov nej sawv daws zam lub txim pub kuv thiab. Vim tias zaum no, yog thawj zaug kuv tuaj ntsib nej nyob rau hauv phau ntawv Liaj Luv Xa Moo no xwb. Yog muaj caij nyoog zoo, mam rov tuaj ntsib nej dua !

Tus sau : As Nub Lis (Liaj Luv Xa Moo 2015)