KAB MOB CORONA NYOB AWS LOS PAS TEB

Ntawv xov xwm tshaj tias hnub tim 6 lub 3 hlis 2020 no, cov kws tshuaj hais tias muaj ib tug neeg kis tus kab mob Corona uas yog tus kab mob tshiab Covid 19 tuag nyob hauv lub nroog Rotterdam, teb chaws Nes Des (Netherlands). Tus neeg tuag ntawd yog ib tug txiv neej hnub nyoog 86 xyoo. Yog ib tug neeg mob nyob hauv lub tsev kho mob Rotterdam City, uas yog lub nroog loj tim 2 nyob Nes Des teb. Ntawv xov xwm tsis hais meej tias vim li cas tus txiv neej ntawd thiaj kis tus kab mob Covid 19. Tam sim no nyob Nes Des teb, muaj cov neeg mob Covid 19 yog 82 leeg. 
Nyob Xaws Npias teb (Serbia), cov kws kho mob hais tias muaj 2 tug neeg mob tus kab mob Covid 19, cov tub ceev xwm tau caum thiab hu cov neeg uas txheeb ze ntawm 2 tug neeg mob ntawd coj los soj ntsuam thiab txwv tsis pub mus qhov twg lawm. Nyob Vas Tis Kas cov kws tshuaj kuj tshawb pom thawj tug neeg kis tus kab mob Covid 19 ib yam. Tab sis cov kws tshuaj tsis tau hais meej tias tus neeg mob Covid 19 ntawd puas yog cov neeg nyob Vas Tis Kas los yog nyob lwm qhov. Vas Tis Kas tseem ua pov thawj tias : qhov uas sawv daws xyav tias Vaj Qhia Fas Ntshis Kus mob tus kab mob Covid 19 ntawd, mas tsis yog tiag. Cov kws tshuaj soj ntsuam lawm, Vaj Qhia tsuas yog raug khaub thuas xwb. Txawm li cas kuj xij, tam sim no Vas Tis Kas tau hloov cov caij nyoog ua hauj lwm ntawm Vaj Qhia me ntsis kom haum lub caij nyoog. 
Nyob Suav teb, yog lub teb chaws muaj cov neeg mob Corona thiab Covid 19 coob tshaj. Tsiab peb caug Suav xyoo no, cov tseem hwv txwv tsis pub tsoom pej xeem sib sau ua si lom zem, kom nyias nyob nyias vaj nyias tsev. Tsis tas li ntawd, tam sim no tseem hwv Suav kuj kaw cov tsev qhia ntawv txhua lub nyob txhua txhia qhov chaw. Cov xib hwb qhia ntawv xa tej ntaub ntawv nyob hauv xov tooj rau cov me nyuam kawm ntawv niam thiab txiv, kom cov niam cov txiv qhia lawv nyob me nyuam kawm ntawv nyob hauv tsev, hauv xov tooj xwb. Cov teb chaws uas muaj cov neeg mob tus kab mob Covid 19, mas tam sim no muaj 100 lub teb chaws lawm. 
Tus txhais : Lis Maib, Zoo Tswv Zov Yaj