KEV TXHAUM YOG DAB TSI?

Kev txhaum yog lo lus hais, yog kev yus ua tsis zoo rau luag, kev txhob txwm ua thiab hla neeg txhua txoj cai. Hla Tswv Ntuj txoj kev hlub uas muab rau neeg. Dhau ntawd lawm, lub ntsiab ntawm kev txhaum tseem dav dua qhov hla neeg txoj cai thiab qhov neeg pom. Kev txhaum yog kev khiav ntawm Tswv Ntuj thiab tsis quav ntsej txog Tswv Ntuj. Kev txhaum yog kev hlub tus kheej xwb, tsis hlub luag tej. Thaum yus tsis muaj kev hlub luag tej, mas zoo li yus tab tom thuam Tswv Ntuj. Kev txhaum ua kom yus ntxhov siab, vim yus paub tias yus ua txhaum. Kev txhaum yog tshuaj lom zem thiab ua kom lub ntiaj teb puas tsuaj. Vim li ntawd, peb thiaj tsim nyog yuav paub txog kev txhaum thiab lub txim hnyav ntawm kev ua txhaum uas coj peb mus nrug deb ntawm Tswv Ntuj. 
Muaj coob leej hais tias : “Kuv ua txhaum ntau dhau, tsis tsim nyog Tswv Ntuj yuav zam txhaum rau kuv”. Qhov no yog qhov uas neeg ib txwm hais kam. Kev  txhaum yog kev hla Tswv Ntuj txoj kev nyiam kev hlub, tsis muaj ib yam kev txhaum twg loj cuag txoj kev txhaum uas hla Tswv Ntuj txoj kev nyiam kev hlub. 
Peb yuav ua cas thiaj paub tias txhaum loj los txhaum me ? Kev txhaum loj yog ua kom ib tug neeg twg hla Tswv Ntuj txoj kev hlub. Tus neeg hla Tswv Ntuj txoj kev nyiam kev hlub, mas nws yuav tsis kaj siab mus ib sim neej. Vim li ntawd, kev hla Tswv Ntuj txoj kev nyiam kev hlub thiaj yog kev ua txhaum loj. Kev txhaum loj yog kev sib tawg ntawm Tswv Ntuj. Kev txhaum me, rhuav tshem neeg thiab Tswv Ntuj txoj kev sib fim, ua kom neeg hnov qab txog Tswv Ntuj. Tus neeg uas ua siab tiaj tus thiab nyob twj ywm xav txog Yes Xus tus Ntoo Cuam, mas nws thiaj paub tias kev txhaum loj yog dab tsi. Ntau zaus peb xav tias kev txhaum loj, yog kev tua neeg npog neeg, tab sis ntawd yog kev txhaum ntawm neeg ntiaj teb xwb. Kev txhaum loj, yog kev hla Tswv Ntuj txoj kev nyiam kev  hlub. Yog neeg hwm Tswv Ntuj txoj kev nyiam kev hlub thiab neeg tsis hla, mas kev tua neeg yuav tsis muaj tshwm sim. Vim li ntawd, peb thiaj hais tau tias kev ua txhaum loj, yog kev hla Tswv Ntuj txoj kev nyiam kev hlub.