KAW TEB CHAWS VIM COVID-19

Tus kab mob Covid-19 sib kis heev kawg, ua rau 19 lub teb chaws kaw kev tiv thaiv kab mob. Cov teb chaws uas kaw muaj li no : Mas Les Xias teb txwv tsis pub nkag teb chaws thiab tawm teb chaws li 2 lub lis piam. Pos Kas teb (Poland), kaw ciam teb 10 hnub tsis pub cov neeg Suav mus Pos Kas teb, thiab cov yim neeg nyias kaw nyob hauv nyias tsev li 14 hnub. Nplus Nes teb txwv tsis pub tsoom pej xeem tawm mus txawv teb chaws. Tses Kos teb (Czech) txwv tsis pub cov pej xeem tawm mus txawv teb chaws, tshwj zias cov neeg ncig tsham teb chaws xwb. Yog tus neeg twg los ntawm 15 lub teb chaws uas muaj mob loj, mas yuav raug kaw 14 hnub thiab rho Visa ib ntus. Kas Nas Das teb kaw ciam teb, txwv tsis pub neeg txawv teb chaws nkag mus, tshwj zias cov neeg As Mes Lis Kas. Lav Xias teb txwv tsis pub cov neeg txawv teb chaws nkag mus, kaw cov tsev kawm ntawv thiab kev lag luam. Xos Vas Kias teb ceeb toom muaj kab mob loj. Is Tas Lias teb txwv tsis pub tsoom pej xeem tawm mus txawv nroog, txwv cov neeg nyob hauv 4 lub teb chaws uas muaj mob loj nkag mus Is Tas Lias teb, tsis pub ua tej lub ntees lom zem tom tej tshav puam thiab txwv tsis pub sib sau nyob coob leej ua ke. Nos Zaws teb (Norway), txwv tsis pub tsoom pej xeem tawm teb chaws thiab nkag teb chaws li 2 lub lis piam. Kaw cov tsev kawm ntawv, kaw kev lag luam nruab hnub, kaw cov tsev muag zaub mov noj, thiab neeg yuav tsum nyob sib nrug li 2 mev. Xus Is teb (Switzerland), kaw cov tsev kawm ntawv mus kom tag lub 4 hlis. Xyis Pas Yas teb (Spaine), txwv tsis pub neeg tawm mus nraum zoov, tshwj zias tus muaj hauj lwm tseem ceeb. Kaw cov khw muag khaub ncaws thiab toob xib, tsuas tseg cov khw muag zaub mov noj xwb. Lib Thuas Nias teb, kaw cov tsev kawm ntawv thiab cov tsev haus dej haus cawv lom zem hmo ntuj nyob hauv lub nroog Vis Nis Us. Kaw cov tsev ua yeeb yaj kiab thiab cov tshav ncaws pob. Fab Kis teb txwv tas cov teb chaws E.U 30 hnub. Tsis pub neeg tawm hauv tsev li 15 hnub. Tsis pub ua tej yam lom zem nyob hauv tej tshav puam thiab tsis sau nqi dej nqi hluav taws xob. Is Ntias teb txwv tsis pub neeg lwm teb chaws nkag Is Ntias teb thiab rho Visa ncig tsham teb chaws. Das Mas teb (Denmark), kaw ciam teb 30 hnub thiab tsis pub neeg txawv teb chaws nkag mus. Nes Pas teb, txwv tsis pub mus nce cov roob siab mus txog hnub tim 30 lub 4 hlis. Fis Lis Pees teb ceeb toom Mas Nis Las yog lub nroog muaj kab mob thiab txwv tsis pub neeg nkag mus. Nyob Thaib teb, muaj 3 lub xeev raug kaw lawm, yam li lub xeev Buriram, lub xeev Uthaithani thiab lub xeev Nakhonratchasima. 3 lub xeev no, tsis pub lwm cov neeg txawv xeev nkag mus thiab kuj tsis pub cov neeg nyob hauv 3 lub xeev no tawm mus lwm qhov.