KEV VAM KHOM YOG TUS KAB MOB SIB KIS NYOB HAUV NEEG LUB SIAB

Nyob hauv hnub chiv tim 12 lub 4 hlis no, Vaj Qhia ua tswv cuab coj tsoom ntseeg ua Hmoov Hla nyob hauv tuam tsev teev Ntuj hwm Leej Ntshiab Pob Zeb. Raws kab ke Txi Ntuj hauv hnub ua Hmoov Hla mas Vaj Qhia yuav tsis nthuav ntawv Moo Zoo tiam sis yuav rau sawv daws nyob ntsiag twj ywm xav txog ntawv Moo Zoo nyob hauv nyias siab. Tom qab Thaj Txi Ntuj tas, mas Vaj Qhia Fas Ntshis Kus thiaj foom hmoov zoo rau nroog Los Mas thiab ntiaj teb. (Urbi et Orbi)
Vaj Qhia Fas Ntshis Kus cov lus foom koob hmoov mas zoo li no : Leej Pleev yog kev vam khom uas sawv rov los. kev vam khom yog ib tus kab mob sib kis tau yog sib nphav uas txawv lwm tus kab mob, vim kev vam khom sib kis nyob hauv neeg nruab siab ntawm ib tus mus rau ib tus. Yog neeg lub siab tos txais lub Moo Zoo, yog tus kab mob kis mus rau lwm tus nyob hauv kev sib nphav sib kov vim lawv muaj kev vam khom. Yog vam khom txog Leej Pleev kev sawv rov los.
Huab Tais Yes Xus kev sawv rov los tsis yog ib yam hwj huam yees ntxwv yuav daws teeb meem, tiam sis yog kev nyiam yeej kev txhaum. 
Tus sawv hauv kev tuag rov los yog tib tug uas lawv muab ntxia saum ntoo cuam, nws muaj cov qhov txhab nrog nws nyob mus li. Cov qhov txhab ntawd yog lub qhov rai vam khom. Thov peb tsa muag ntsia Huab Tais Yes Xus, kom Huab Tais Yes Xus ntxuav peb qhov mob.
 Vaj Qhia Fas Ntshis Kus thov kom Huab Tais Tswv Ntuj txais cov neeg tuag vim tus kab mob Covid-19 no tus ntsuj plig mus nyob saum Ntuj Ceeb Tsheej thiab thov pab txhawb sawv daws dag zog kom yeej tus kab mob no.
Vaj Qhia hais tias tus kab mob no ua rau ntiaj teb neeg nyob deb ntawm lub Cim Yug thiab Cim Daws Txhaum, tiam sis Huab Tais Tswv Ntuj yuav tsis tso peb ua ntsuag. Nyob hauv peb kev thov Ntuj ua ke, mas peb tso siab tias Tswv Ntuj tso nws txhais tes los nyob saum peb, nws hais rau peb tias ‘txhob ntshai, kuv sawv rov qab los thiab kuv yuav nyob hauv nej’.
Tsis tas li, Vaj Qhia thov ua cov kws tshuaj, cov zov neeg mob, cov siab dawb pab lwm tus, cov tub peeb zeej, cov ua lag luag muas toob xib noj haus sawv daws tsaug vim lawv tsis tso lwm tus pov tseg. Vaj Qhia thov kom cov nom tswv npaj nrhiav hauj lwm rau sawv daws thaum dhau lub zim txwv no mus.
“Ntiaj teb tab tom raug kev txom nyem, yog li peb sawv daws yuav tsum tawm tsam ua ke. Thov Huab Tais Yes Xus muab kev vam khom rau cov txom nyem, thov Huab Tais Yes Xus muab kev vam khom rau cov neeg thoj nam thiab tsis muaj chaw nkaum.”
“Thov peb txhob muab peb ua qhov loj, thov peb txhob xav txog peb xwb. Vim qhov no yuav nrhuav kev thaj yeeb thiab kev vam meej hauv tib neeg.”
“Zim txwv no tsis yog lub caij peb yuav sib tawg ua pab ua pawg, tsis sib haum xeeb. Zim txwv no tsis yog caij peb yuav nqes peev ua tsov ua rog, tiam sis yog zim txwv peb yuav muab nyiaj txiag los txuag neeg txoj sia.”
“Xwv txheej no tsis yog ua kom peb tsis hnov qab txog lwm yam teeb meem. Vim kev tsis hnov qab,  kev saib yus loj dua lwm tus, kev tsis sib haum xeeb, kev tsis quav ntsej txog lwm tus; tsis yog cov lus peb xav hnov.” 
Vaj Qhia hais tias cov nqe lus ntawd zoo tshaj mas yuav tsis hnov mus li yuav zoo dua, vim cov lus ntawd yuav muaj zog dua peb thaum peb poob rau kev ntshai thiab kev tuag yeej peb. Yuav muaj hwj chim loj yog peb tsis rau Huab Tais Yes Xus muaj yeej nyob hauv peb. 
“Nyob zoo Caiij Hla mog.”
Vam txog : Pope Report
Tus txhais : Muas Lauj, Zoo Tswv Zov Yaj