NEEG KEV NPLUA NUJ.

Kev Nplua Nuj nyob ntiaj teb no, yog ib yam loj kawg.  Nws coj tau kom Neeg muaj hwj chim,koob meej ncha lam lug mus tau deb kawg. Nws coj tau neeg lub  meej Mom Koob Meej mus nto plaws rau ntawm Rooj Ntug kiag.
Nyob hauv kev Nplua Nuj muaj ntau txoj! Yuav muab plaub tug Neeg plaub daim duab,los nthuav raws li yuav tso los mus no rau sawv daws saib:
Ib tug neeg muaj hmoo nyob ntiaj teb no, ua neeg Nplua Nuj. Nws siv zog khwv, mas nws khwv tau nyiaj txiag sai kawg. Nws txuag kev noj kev haus kom noj tsawg hnav tsawg, Tsis siv nyiaj los muas tej cuab yeej, toob xib los rau hauv lub vaj lub tsev siv li. Nws txoj kev noj qab hnav zoo,nws kuj ntshai tsam ho muaj neeg paub tias nws ua neej nplua nuj. Nws hwm nws pob nyiaj cuag li yog ib tug Tim Tswv. Nws lub siab nyiam nyiaj tshaj txhua yam, los ua lub mom koob meej rau nws ntoo. Kom teb chaws hwm nws xws li ib tug Tim Tswv, Nplua Nuj nyob rau ntiaj teb.  Thiab nws xav tias pob nyiaj no yuav txawj txuag nws txoj sia,kom ua neej nyob laus nkoos, tsis txawj tuag. Nws txoj kev xav ntawd mas twb yog kev pluag lawm, nws cov nyiaj tsis yog nws tug.   Zoo li nws pab lwm tus ceev nyiaj cia xwb. Nws siv los kov tsis tau, tsam kev pluag raws tau nws qab. Nws tseem pluag tshaj cov neeg pluag lawm,tsis yog nws ua tswv kav nyiaj,hos yog nyiaj ua tswv kav nws.

Tus Neeg Nplua Nuj tim Ob no,nws muaj tswv yim zoo heev, Nws kuj muaj hmoo nrog, Nws tuav los kav tej lub koom haum tsim nyiaj, kom tau ua Neeg Nplua Nuj. Nws tsim muaj toob xib ntau coj mus muag puv teb chaws.  Nws muaj lub siab lub tswv yim nyiam kom neeg muab nws hu thiab hwm li tej tus Tim Tswv Nplua Nuj dua los lawd. Nws kuj muaj phooj ywg coob,vim neeg tos saib puas muaj nyiaj poob ntawm nws ob sab tes los,li poob saum ntuj los rau lawv. Hom Neeg Nplua Nuj no,lawv sib hwm lawv cov nplua nuj sib xws,nws cov Phooj ywg kuj yog pab neeg nplua nuj thiab xwb. Lawv kev pab cuam rau cov neeg pluag muaj tsawg. Tus Neeg Nplua Nuj li no, lawv lub Npe,lub hwj chim yuav nto moo lug mus txog txheej ntuj siab saud thiab: Thaum lawv hla lub ntiaj teb no mus txog pem Rooj Ntug, mas yam uas lawv yuav xub pom, yog lawv cov Roob Nyiaj. Yuav muaj tus hais rau lawv tias, Koj mus nyob ntiaj teb koj tau khwv nrhiav nyiaj xwb. Cov roob nyiaj ntawd, yog koj li,Qaum Ntuj cov nyiaj tsis yog cov no! Koj rau siab khwv tau lawm koj ua tus saib, tsam tub sab tub nyiag ho tuaj nyiag mus lawm. Cov nyiaj no yog Av!  Koj yuav nyob zov kom thaum nyiaj yaj tas mus ua Av lawm, mas koj mam los mus thawj thiab tau.

Tus Neeg Nplu Nuj tim peb no, mas nws tsuas khwv txaus noj txaus hnav xwb. Kom tsis tau mus thov khawv nruab zej nruab zog los yug siav xwb. Tab sis nyob hauv Nws lub neej mas nws nco txog nyiaj, thiab tham txog nyiaj nkaus xwb. Lwm yam nws tsis hais txog li. Nws nyiam nrog lwm tus neeg sib tw saib leej twg yuav muaj hmoo thiab Nplau Nuj tshaj. Nws lub siab dai dhuam nrog nyiaj mus li, nyob los tham txog nyiaj, pw los kuj ua npau suav txog nyiaj mus li.  Nws ntshaw nyiaj tshaj txhua yam nyob ntiaj teb no. Tus neeg no ua neej nyob ntiaj teb nws txom nyem siab heev vim muaj nyiaj tsis txaus. Nyob pem Rooj Ntug kuj muaj neeg khaws thiab teev nws cov nyiaj tseg kom tau ntau Roob li thawj ob tug ntawd tib yam. Vim thaum nws ua neej nyob nws tau muab tas nrho nws lub siab los tham xav thiab hu nyiaj mus li, kom tau ua neeg Nplua Nuj. Nws thov Kom Ntuj pub nyiaj rau nws txhua lub caij,ces nws zoo siab lawm. Ces luag yuav muab cov Roob nyiaj nws ntshaw ntawd tso rau nws raws li nws tau tos. Nws kuj yuav yog ib tug neeg Nplua Nuj tiam tom ntej li nws kev ntshaw, yog cov nyiaj tawm ntawm Av los,nws yuav tau nyob zov ua nws tug. Thaum nws ua neej nyob ntiaj teb no, nws thov nyiaj xwb, mas nws cov koob hmoov yog nyiaj tib si li nws tau thov no.

Tus Neeg Nplua Nuj saum Koob Hmoov,thiab nyiaj txiag,uas nws muaj nyiaj txaus noj, thiab pub taus rau cov Neeg Pluag. Yog tus muaj Hmoo heev, thiaj tau ua Neeg Nplua Nuj rau ob sab no tib si. Nws txhab nyiaj nyob ntiaj teb no mas mus tsis muaj txog qhov uas yuav muaj tsheej Roob Nyiaj. Nyob ntiaj teb no nws muab kev nyiam kev hlub, kev khuv leej luag tej los tso ze rau ntawm nws ob txhais tes. Nws ntshaw kev Nplua Nuj rau sab Koob Hmoov ntau dua. Sab ua Neeg Nplua Nuj muaj nyiaj ntau, nws tsuas xav kom muaj mov txaus noj txwm hnub xwb. Nws muaj tshaj ntawm qhov noj qhov hnav,me ntsis lawm nws qee los pab rau cov pluag dua nws. Tus no nws muaj lub neej lom zem nyob ntiaj teb no, Nws muaj phooj ywg coob. Nws taug kev deb tsis nco qab ntim mov  los nws tsis tuag tshaib. Nws tej Koob Hmoov ncha nyob ntiaj teb no mus nto plaws rau Qaum Ntuj. Nyob Qaum Ntuj nws muaj Roob Nyiaj Roob Kub, Roob Pov Haum,thiab Roob Koob Hmoov nco lug. Nws tseem muaj tej niag tiaj nras neeg tsa suab hlo cav rau Qaum ntuj hnov tias,tus neeg siab dawb yog tus ntawd, peb tau hnav ntaub tsuj ntau npuag, los peb diav mov yug ncauj yug lo yog tawm ntawm nws txhais tes los muaj ib feem thiab.

Zaj lus no kuv sau los ua kev kawm rau cov neeg thoob tsib hwj sab ntsuj Plig. yog txoj kev uas neeg yuav sib tw zam Xas Tas kev haub kev ntxias kom muaj neeg to taub tias tseem muaj ib co kev kawm rau sab no thiab.

Peb Hmoob yeej muaj ib lo lus hais tias, koj tsis muaj nyiaj los txhob seev rau luag tej hnov. Koj txawm seev tias koj pluag pluag li los,luag yeej tsis pub nyiaj rau koj. Luag tsuas teb rau koj tias, txhob tu siab mog, rov mus tsev es rhiav mov noj thiab rauv taws nte kom sov sov no xwb, luag twb tsis tau muab ib nplooj ntawv nyiaj rau koj coj mus muas mov noj.

Koj mus ntsib luag ua lag luam, luag txhob koj tias, pab peb yuav os! koj tsis muaj nyiaj, Koj yuav teb tias, kuv nyiam tsis tas lwm zaus tso no xwb, mas thiaj yog lus. Yog koj teb tias xav yuav kawg tiag, tsis muaj nyiaj li ne!  Luag cia li muab pub kiag rau koj, mas seev tau kawg! 
Koj lub suab seev no koj seev rau Leej twg mloog!  Puas tsim nyog rau Koj seev li ntawd! Yus yuav ceev yus lub npe kom pluag tsis paub tias yus pluag rau leej twg hnov li.

"Tab yog koj tsis muaj nyiaj kub nyob hauv tsev, los lam khaws tej kub nyuj kub tshis los tso rau ntawm tej kaum tsev. Thaum luag nug tias koj puas muaj kub? Yus tau teb tias kuv muaj kub thiab no hod."

Yog luag xav saib no,coj luag los saib tus kub ntawd. Thiab koj to taub tias yog hais yam ntawd no xwb.
Tus sau : XH. Yaj Zoov Ntxheb