LUB SIJ HAWM TUS KAB MOB COVID-19 SIB KIS, MAS YOG LUB SIJ HAWM XAV TEJ YAM TSHIAB

Wednesday, April 22, 2020

"Cov leej ntshiab nyob ib ncig yus tog vaj tog tsev, mas yog cov neeg nyob ze yus."
-Vaj Qhia Fas Ntshis Kus-

"Tswv Ntuj zam txim rau neeg tas mus li,
tab sis huab cua dej av tsis zam txim rau leej twg."
-Vaj Qhia Fas Ntshis Kus-

Vaj Qhia Fas Ntshis Kus nrog ib tug kws txuj Dr. Austen Ivorah uas nws yog ib tug tub xov xwm Vas Tis Kas neeg Aas Kiv sib tham. Vaj Qhia hais tias : lub sij hawm uas tus kab mob Covid-19 sib kis, mas yog lub sij hawm xav tej yam tshiab tshiab. Yuav tsum tsis txhob nyob twj ywm tsis ua ib qho dab tsi.
Yam uas Vaj Qhia ua mas yog tso thaj txi Ntuj txhua tag kis nyob hauv online thiab qhov tshwj xeeb tshaj, mas yog foom hmoov zoo rau cov neeg nyob Los Mas thiab tas ntiaj teb neeg.
Qhov Vaj Qhia ua no yog ib qho koom nrog cov neeg ntseeg uas tab tom raug kev kub ntxhov mus kev ua ke. Vaj Qhia hais tias : kev sib kis tus kab mob no, Tswv Ntuj tsis tau ua hwj huam dab tsi, tab sis yog sawv daws sib koom tes nrog cov leej ntshiab nyob ib ncig yus, mloog thiab ua raws li lawv cov lus qhia, yam li mloog cov kws kho mob qhia mas txhua yam yuav zoo.
Vaj Qhia tau hais ib lo lus tias : cov leej ntshiab nyob ib ncig yus tog vaj tog tsev, mas yog cov neeg nyob ze yus. Vim lawv zoo ib yam li ib co Leej Ntshiab nyob ze yus ntag. Li ntawd, peb yuav yog ib feem nyob hauv cov neeg ua hauj lwm no.
Tus kab mob Covid-19 ua teeb meem kub ntxhov rau peb txhua tus, tsis hais tus muaj los pluag, sawv daws puav leej raug cov teeb meem txhua. Qhov uas poob siab tshaj, mas yog qhov tias tus kab mob no yuav ua kom peb hloov ua neeg tsis paub txog kev kub ntxhov, tsis paub hais tias lwm tus tab tom raug teeb meem. Piv txwv li cov tub tseev tsim uas lawv lub ncauj hais tias yuav daws teeb meem kev tshaib nqhis ntawm tsoom pej xeem, tab sis lawv txhais tes muag riam phom ua tsov rog tas zog.
Thaum lub 3 hlis yuav tas Dr. Austen Ivorah tau sau email nug Vaj Qhia ntau nqe lus, ces tsis pes tsawg hnub Vaj Qhia kaw lus teb thiab xa rov rau Dr. Austen Ivorah. Dr. Austen Ivorah tau muab los sau tawm nyob hauv tsab ntawv xov xwm Kav Tos Liv ntawm Aas Kiv teb, muaj lub ntsiab lus hais li no :
Thawj lo lus Dr. Austen Ivorah nug Vaj Qhia mas yog li no : Vaj Qhia pom dab tsi tshwm nyob hauv lub caij tus kab mob Covid-19 tshwm sim thiab kaw nroog, hais txog Xas Tas Mas Thas thiab Los Mas Khus Lias yuav ua li cas hais txog fab ntsuj plig thiab txoj sia ?
Vaj Qhia hais tias : Los Mas Khus Lias cov neeg ua hauj lwm xwm yeem li qub. Tsuas yog muaj sib hloov ua hauj lwm 2 lub sij hawm, kom cov neeg tsis txhob tau sib sau coob coob ua ke. Tsis tas li ntawd, cov neeg ua hauj lwm nyob Los Mas Khus Lias raug kws kho mob soj ntsuam txhua tus. Hauv lub tsev Xas Tas Mas Thas kuj faib lub sij hawm noj mov ib pluag ua 2 zaug. Sawv daws ua hauj lwm xwm yeem li qub, tsis muaj ib tug neeg twg tu ncua tsis ua hauj lwm.
Hais txog fab ntsuj plig Vaj Qhia hais tias : Vaj Qhia thov Ntuj ntau dua qub vim yog yam tsim nyog yuav tsum ua. Vim Vaj Qhia xav txog yam uas yus tus kheej ua uas yog tus thawj coj ntawm ib txoj kev teev hawm. Vaj Qhia piav tias : nws ntxhov siab heev, vim tsis paub tias yuav coj cov neeg ntseeg mus taug txoj kev twg. Txawm li cas los Vaj Qhia txaus siab rau cov thaj txi Ntuj txhua tag kis uas tso tawm nyob Online thiab nws tau thov Ntuj foom hmoov zoo rau cov neeg nyob Los Mas thiab ntiaj teb neeg.
Dr. Austen Ivorah nug Vaj Qhia ntxiv tias : peb pom kev daws teeb meem ntawm cov nom tswv, lawv kom tsoom pej xeem sawv daws kaw tus kheej nyob hauv tsev, pom tias cov nom tswv zoo siab cia kev lag luam piam sij, vim lawv tsis xav pom lawv cov pej xeem tuag. Tab sis pom tias tseem muaj kev sib cais, ces yus saib zoo li yog ib yam xwm yeem, Vaj Qhia xav li cas txog qhov no ?
Vaj Qhia teb tias : zim txwv no cov neeg tsis muaj vaj tse kuj tseem yog neeg tsis muaj vaj tse, xws li cov neeg tsis muaj vaj tse nyob Lasvegas uas lawv raug tseem hwv yuam kom lawv nyob twj ywm ntawm cov tshav nres tsheb. Tej tsev txais qhua muaj ntau thiab khoob ntshuv cia tsis muaj neeg nyob, tab sis cov neeg tsis muaj vaj tse lawv tsis tuaj yeem mus nyob hauv cov tsev txais qhua tau. Qhov no ntsia pom tias neeg tsis quav ntsej neeg thiab neeg pov tseg neeg tiag.
Dr. Austen Ivorah nug Vaj Qhia tias : Vaj Qhia pom kev lag luam piam sij, puas yog kev rau txim kom neeg rov qab thim xav thiab hloov neeg tus kheej los tsis yog ?
Vaj Qhia hais tias : Tswv Ntuj zam txim rau neeg tas mus li, tab sis huab cua dej av tsis zam txim rau leej twg. Hluav taws qus kub hnyiab, dej nyab thiab cov dej khov yaj, mas pom tseeb tias yog ua kev pauj rau neeg tiag. Vim tib neeg tsis pom qhov muaj nqis ntawm huab cua, dej av, nrog tsuag thiab xyoob ntoo.
Lo lus kawg xav nug tias Vaj Qhia puas muaj ib lo lus hais rau cov laus thiab cov hluas uas lawv niaj hnub nyob hauv tsev. Vaj Qhia hais tias ; cov laus yog peb cov poj yawm txwv koob, lawv yuav tsum nrog lawv me tub me nyuam thiab xeeb ntxwv tham. Kom kev tsis sib nkag siab ntawm cov laus thiab tej me tub me nyuam daws plam mus. Yuav tau los sib tim ntsej tim muag tham thiaj nkag siab thiab yog qhov tseeb. Hais txog cov tub ntxhais hluas txheej tshiab, Vaj Qhia thov kom lawv ua tib zoo saib thiab muaj kev cia siab txog yav tom ntej. Yam twg yog lawv xav lawm, yuav tsum nqis tes ua kom xwm yeem thiab ua ntxiv mus.