TSWV NTUJ YOG TUS MUAJ HWJ HUAM THIAB TSIM NTUJ TSIM TEB

Lub ntsiab ntawm kev ntseeg lo lus no, yog vim peb txoj kev ntseeg uas muaj Tswv Ntuj yog peb Txiv. Vim li cas peb thiaj hais tias Tswv Ntuj yog tus muaj hwj huam ? Vim Tswv Ntuj lub hwj huam ua tau txhua yam, tsis muaj ib yam dab tsi uas yog Tswv Ntuj lub hwj huam ua tsis tau. Tswv Ntuj lub hwj huam nyob siab dua thiab khav tas neeg lub peev xwm. Tsis muaj ib tug neeg twg yuav muaj peev xwm thiab muaj zog loj dua Tswv Ntuj. Lo lus tsim ntuj tsim teb, mas yog Tswv Ntuj lub hwj huam tsim kom muaj txhua tsav txhua yam tshwm sim tam sim ntawd thiab tsis tos caij nyoog los yog vam txog lwm tus pab. Lo lus hais tias ntuj, yog txhua tsav txhua yam uas nyob siab puag saum ntuj uas neeg ncav tsis cuag, xws li cov hnub qub, lub hnub thiab lub hli, qhov tsaus ntuj thiab qhov pom kev. Lo lus hais tias av, yog txhua tsav txhua yam uas nyob saum npoo av thiab qab npoo av. Nyob hauv Ntawv Ntshiab hais txog hiav txwv, dej, xyoob ntoo nroj tsuag, txhua hom kab ntsaum, noog ntses, tsiaj nruab nquab thiab tsiaj nruab deg nrog rau tib neeg huv si. 
Nyob hauv nqe lus no, mas yuav ntsia pom qhov muaj nqis ntawm Tswv Ntuj tsim neeg. Tswv Ntuj tsim neeg xws li Tswv Ntuj tus duab me ntsis, Tswv Ntuj tsim thawj nkawm niam txiv nyob ntiaj teb no yog As Das thiab Es Vas. Tswv Ntuj xuas av los puab kom tsheej neeg thiab tshuab pa rau, ces neeg thiaj muaj txoj sia. Thawj tus neeg uas Tswv Ntuj tsim yog As Das, ces Tswv Ntuj thiaj xuas As Das ib tug tav los tsim Es Vas thiab tshuab pa rau kom muaj sia. Tswv Ntuj tsim As Das thiab Es Vas nkawd ua niam txiv nyob ua ke, kom nkawd tau nyob ywj siab thiab noj qab nyob zoo hauv Tswv Ntuj lub vaj lom zem Es Dees. Tas txhia yam uas Tswv Ntuj tsim, mas Tswv Ntuj saib neeg muaj nqis tshaj. Tswv Ntuj npaj txhua yam kom neeg tau nyob ywj siab thiab noj qab nyob zoo, tso neeg ua tus kav txhua yam thiab nrog tu Tswv Ntuj lub vaj Es Dees. Tswv Ntuj pub lub tswv yim thoob tsib rau neeg, kom neeg txawj xav tom ntej tom qab, ces neeg thiaj yog tus muaj nqis tshaj txhua yam uas Tswv Ntuj tsim los. Nyob hauv Ntawv Ntshiab, As Das thiab Es Vas raug dab phem Xas Tas tuaj ntxias, ces nkawd thiaj ua txhaum. As Das thiab Es Vas nkawd noj tsob txiv ntoo uas Tswv Ntuj txwv tsis pub noj, ces Tswv Ntuj thiaj ntiab nkawd tawm ntawm Tswv Ntuj lub vaj Es Dees. Li cas los peb ntseeg tias Tswv Ntuj yog tus muaj hwj huam, As Das thiab Es Vas nkawd yog tus piv txwv hais txog neeg lub keeb txhaum xwb. Kom peb nco ntsoov tias peb txhua tus neeg yug los yeej muaj txhaum, vim peb lo kev txhaum. Yam li peb cov poj yawm txwv koob tau ua txhaum, mas peb kawg lo lawv txoj kev txhaum. Neeg yuav hais txog peb cov poj yawm txwv koob lawv txoj kev txhaum tas li, ces zoo li peb nrog lawv txhaum, peb ris rawv ntag. Vim li ntawd, Tswv Ntuj yog tus tsim neeg thiab nws khuv leej neeg, Tswv Ntuj thiaj xa nws Leej Tub Twm Zeej tuaj tuag txhiv ntiaj teb neeg txoj kev txhaum, kom ntiaj teb neeg tig los yuav lub siab tshiab thiab xaiv txoj kev mus cuag Tswv Ntuj.