TXIV PLIG NYIAJ POV LUB NPE CIAJ SIA

"Tas tsoom Hmoob huv tib si yog kuv cov tub ki. "
-Txiv Plig Nyiaj Pov-

Ua ntej Txiv Plig Nyiaj Pov yuav ncaim peb mus, nws tau tuaj xyuas wb nyob Sheboygan. Nws thov kom wb tsim tsa ib lub Koom Haum los tuav nws cov txuj ci thiab nws txoj kev hlub rau peb haiv Hmoob. Nws tau nrog Hmoob nyob 50 tawm xyoo, nws coj kev ntseeg tuaj rau Hmoob, tab sis nws tsis tau yuam kom Hmoob yuav tsum ntseeg Yes Xus xwb xwb thiaj zoo. Nws cia Hmoob mam li txiav txim siab, Hmoob mam li ntseeg Hmoob, Hmoob thiaj li ntseeg ruaj, ntseeg tseeb thiab Hmoob thiaj li tau txais txiaj ntsim ntawm Tswv Ntuj ua Hmoob tug. Nws tsim tus Ntawv Hmoob Thoob Teb rau Hmoob kawm, rau Hmoob sau khaws Hmoob tej txuj ci tseg. Nws paub zoo hais tias nws yog ib tug Txiv Plig, nws txoj hauj lwm yog tshaj Tswv Ntuj Lus, coj Tswv Ntuj lub Moo Zoo mus kom thoob qab ntuj khwb. Tab sis, nws tsis hem kom Hmoob yuav tsum ntseeg Yes Xus xwb thiaj tag. Nws yeej paub zoo tias, tab txawm Hmoob tsis tau los ntseeg Yes Xus los, muaj ib cov Hmoob coj lub siab zoo, siab ntshiab, thiab ua haum Tswv Ntuj siab nyiam.
Txiv Plig Nyiaj Pov tham rau wb tag, nws rov mus xyuas hauj lwm rau Thaib teb lawm. Lub 8 hli ntuj xiab 1 xyoo 2005, peb tsim tsa tau lub Koom Haum thiab thov tau ntaub ntawv tso cai ntawm tseem fwv nroog Wisconsin tiav tag. Lub Koom Haum lub npe hu ua : TP NYIAJ POV FOUNDATION, Inc. (http://www.hmongrpa.org/index.html)
Lub hom phiaj ntawm lub Koom Haum yog : 
1. Koom tes pab txhawb phaum hluas Hmoob nyob qab ntuj khwb no txoj kev kawm ntawv.
2. Tsim thiab kho cov txuj ci kev qhia rau hauv ntaub ntawv kom kawm yooj yim.
3. Tsim rooj cob qhia thiab rooj sab laj los txhawb txhim kho kab lis kev cai Hmoob.
4. Khaws Hmoob tej txuj ci muaj nqis cia rau hauv ntaub ntawv kom txhob pub ploj.
5. Txhawb nqa kev tshawb fawb nthuav Hmoob txuj ci kom tib neeg tau siv thiab tau kawm.
6. Pab txhawb nyiaj txiag rau cov kawm Hmoob li txuj theem siab los qhuab qhia neeg.

 Cov thawj coj thawj pab muaj npe li no:
1. Txiv Plig Nyiaj Pov, yog tus thawj Tswj Koom Haum.
2. Txhiaj Vwj Yaj, yog tus tuav ntaub ntawv thiab ceev nyiaj.
3. Fr. Roland Jacques thiab Paj Yaj, yog cov tub koom tswj lub Koom Haum.

Tom qab Txiv Plig Nyiaj Pov tau tso peb tseg lawm, peb rov muaj xaiv tsa dua ib pab los tswj lub Koom Haum kom raws kev cai.
Tim 27 lub 5 hlis xyoo 2007, Txiv Plig Nyiaj Pov tau tag sim neej nyob Fab Kis teb. Cov thawj coj sawv cev ntawm ib tsoom Hmoob nyob ntau lub teb chaws tau tuaj mus ua nws lub ntees nyob Orléans. Tom qab ntawd, tau coj nws lub cev mus sam sab rau lub toj ntxas nyob pontmain, yog lub zos thaum ub Txiv Plig Nyiaj Pov txais lub Cim Tiag Tes ua Txiv Plig.
Ua ntej Txiv Plig yuav ncaim peb mus lub 8 hli ntuj, tim 15 xyoo 2006, nyob Pontmain, nws sau 2 lo lus tias :
- Tas tsoom Hmoob huv tib si yog kuv cov tub ki. Cov ntseeg thiab cov tsis tau los ntseeg huv tib si. Thaum twg kuv puv 120 xyoo, kuv vam tias sawv daws yuav nta kuv lub ntees zoo li Hmoob ua rau ib leeg txiv los ib tug laus. Kuv vam tias nej sawv daws yuav thov Ntuj tsis tseg rau kuv.
- Kuv kuj tau hais ob peb lo lus rau sawv daws, muab tso rau tim As Mes Lis Kas teb. Txog caij txog nyoog mas lawv yuav muab qhib rau sawv daws hnov.

Tus sau : Txhiaj Vwj Yaj, USA