KOJ NYIAM LUB NTIAJ TEB TSIM TXOM KOJ

Nyob hauv hnub plaub hauv lis piam dhaus los los yog hnub tim 29 lub 4 hlis, Vaj Qhia Fas Ntshis Kus tau ntuas tsoom ntseeg sawv daws uas tab tom saib nyob hauv online txog Huab Tais Yes Xus lo lus ‘Cov tau txoj hmoov zoo, yog cov raug luag hiam vim txoj kev ncaj, Ntuj lub Ceeb Tsheej yog lawv tug’. (MT 5:10)
Vaj Qhia hais tias zaj hais txog ‘Txoj Hmoov Zoo’ nqe no yog nqe kawg, tiam sis xaus zoo tib yam li thawj nqe thiab, yog hais txog Ntuj lub Ceeb Tsheej.
“Huab Tais Yes Xus maj mam qhia Ntuj Ceeb Tsheej rau peb pom, yog txoj kev hla ntawm txoj sia raws ntiaj teb mus rau txoj sia nyob mus li hauv Tswv Ntuj. Txawm li cas los, txoj kev tshaj lub Moo Zoo no, lub ntiaj teb tsis pom zoo vim cov txhaum nyob hauv tib neeg ua rau tib neeg tsis lees paub txog txiaj ntsim ntawm lub Moo Zoo thiab lawv tseem hais tias txoj sia raws lub Moo Zoo mas tsis yog.”
Vaj Qhia hais ntxiv tias thaum lub ntiaj teb no pom tias muaj cov tib neeg ua neej nyob hauv kev hom khaj, ua rau lub ntiaj teb tsis zoo siab, thiaj muaj kev sib tham  txog kev zoo los yog tsis lees paub txog qhov pom kev thiab ua rau neeg lub siab txhav, npau taws.
Vim tej hais los no, mas peb thiaj pom ib qho chaw daws tej xwv txheej ntawd. Tus neeg tsis ua raws ntiaj teb vim Leej Pleev thiaj yog tus ntsib kev xyiv fab thiab muaj hmoov zoo, vim nws tau yam muaj nqis dua lub ntiaj teb lawm.
Vaj Qhia tau piav txog cov ntseeg tiam tim ib tias lawv raug hiam raug tsim txom, mas lawv thov Ntuj kom tej xwm ntawd dhau mus sai.  Tiam sis peb yuav tsis txhob xav yuam kev tias Huab Tais Yes Xus nqe lus qhia txog txoj hmoov zoo kawm no yuav qhia peb tias cov ntseeg yuav tsum raug hiam tas mus li.
Vaj Qhia piav txog tus hauv paus xa lus Paj Lug rau sawv daws mloog tias Paj Lug xav tias nws yog neeg ncaj, tiam sis  thaum nws paub tias kev haim lwm tus tsis yog qhov zoo ces nws hloov siab tshiab, nws thiaj tau ua tus neeg muaj kev nyiam. Paj Lug zoo siab tim ntsej nrog txoj kev raug hiam.
Kawg no Vaj Qhia kom peb txaus siab tim ntsej tim muag nrog txoj kev raug tsim txom, yog tias qhov ntawd coj Ntuj lub txiaj ntsim los txog peb, yog ua kom peb muaj lub neej xws li Huab Tais Yes Xus.
“Kev txais Leej Pleev tus plig los nyob hauv peb yuav coj peb mus cuag txoj kev nyiam tseeb hauv ntiaj teb no tau.” Vaj Qhia xaus.