YOG VIM LI CAS KOJ RAU SIAB UA DEJ NUM TXHIB HMOOB KOM KAWM NTAWV HMOOB 1

Tsab ntawv nram no yog Txiv Plig Nyiaj Pov sau nyob rau hnub tim 20 lub 5 hlis xyoo 2003, Txiv Plig Nyiaj Pov teb Txiv Plig Txhiaj Foom thiab cov kwv tij Hmoob li lus nug nws tias : Yog vim li cas koj rau siab ua dej num txhib Hmoob kom lawv kawm ntawv hmoob ? Vim li cas koj siv nyiaj thiab nkim zim txwv los sau tej phau ntawv Hmoob tsis qhia kev ntseeg ? 
Txiv Plig Nyiaj Pov tau sau nws li lus teb ob nqe lus nug ntawd li nram no : Kwv tij Hmoob, thov nej ua siab ntev nyeem kuv cov lus teb no. Thaum kuv tseem nyob Fab Kis teb, kuv tab tom kawm txuj ua Leej Choj, kuv nyeem tej phaum ntawv Fab Kis nthuav tej tus Leej Choj lub neej mus tshaj Ntuj Lus nyob As Xias teb. Piv li Txiv Plig Lib Tsis (los hais tias Lim Mas Taum) mus tshaj Ntuj Lus nyob Suav teb. Lim Mas Taum txia ua Suav, tsim tej phau ntawv siv lus Suav qhia txuj thiab qhia kev ntseeg. nyob Suav teb. Yog thaum Tiam 17. Tib lub caij ntawd, Txiv Plig Los Daws tsim cov ntawv Cob Tsib. Nyob Is Ntias teb, Txiv Plig Nom Npis Lim txia ua ib tug Txiv Twj Cuab Is Ntias. Tseem muaj lwm cov Txiv Plig tsim ntawv pab cov neeg ntseeg nyob Mes Xis Kos teb thiab nyob As Mes Lis Kas Naj.
Thaum kuv npaj ua Leej Choj, tus Txiv Plig uas kuv kawm nws lub neej zoo dua yog Txiv Plig Lim Mas Taum. Yus paub tias yus yuav ua tsis tau zoo npaum li nws. Tab sis Lim Mas Taum yog ib tug piv txwv zoo coj yus kev tshaj Ntuj Lus ib sim nej.
Xyoo 1947, cov hlob tswj lub Koom Haum Os Nplas (OMI) xa kuv mus tshaj Ntuj Lus nyob Los Tsuas teb. Lub 2 hlis 1948, kuv tuaj txog Paj Xas, nyob ze ntug dej Naj Khoom. Kuv qhia lus Fab Kis 2 xyoos rau cov hluas tub Los Tsuas npaj ua Txiv Plig. Niaj hnub niaj hmo kuv rau siab kawm lus Los Tsuas.

Vim li cas Tswv Ntuj xa kuv tuaj nyob Paj Xas ob xyoos ? Ntshai yog vim Tswv Ntuj xav kom kuv paub lus Los Tsuas me ntsis tso, hos tom qab Tswv Ntuj yuav xa kuv mus nrog lwm haiv neeg nyob.

Hnub tim 17 lub 4 hli 1950, Tswv Ntuj coj kuv mus pib ua lub neej nyob pem lub zos Roob Nyuj Qus, nrug deb ntawm Luam Phab Npaas 80 km. Hnub tim 18, kuv pib kawm lus Hmoob nyob hauv Yaj Txawj Tswb lub tsev. Nws tus tub ntxawg Zam Nob nrog nws nyob.

Haiv Hmoob tsis muaj ntawv sau lus hmoob. Kuv lam siv cov ntawv Fab Kis los sau cov lus Hmoob uas niaj hnub Zam Nob thiab luag tej qhia rau kuv.

Thaum ntawd, Los Tsuas teb tsis nyob thaj yeeb. Muaj tej pab tub rog Koom Tshaj mus mus los los tsis deb ntawm Roob Nyuj Qus. Lawv hnov hais tias muaj ib tug Fab Kis tuaj nyob Roob Nyuj Qus. Lawv hais tias lawv yuav muab tus Fab Kis ntawd tua. Tus Txiv Plig nyob Luam Phab Npaas kuj hnov luag hais li ntawd thiab, ces nws xa ntawv hu kuv rov qab los nyob Luam Phab Npaas. Xyoo 1951 kuv rov qab los nrog Hmoob nyob Roob Nyuj Qus. 
Xyoo 1952, kuv hnov hais tias ib tug Xib Hwb Plos Tes Taas USA pib sau lus Hmoob thiab. Nws siv cov ntawv USA, hos kuv siv cov ntawv Fab Kis. Ua li mas peb tab tom tsim ob hom ntawv Hmoob sib txawv.
Xyoo 1953, ob tug Xib Hwb USA nrog kuv thiab ob tug tub hluas Hmoob sib sau ib lis piam nyob Luam Phab Npaas; peb tsim cov ntawv Hmoob RPA. Yog cov ntawv Hmoob uas zim txwv no hu ua Ntawv Hmoob Thoob Teb.
Kuv nyob Roob Nyuj Qus muaj tej yim Hmoob txais lub Cim Ntxuav. Peb pib tsim thawj cov zaj teev Ntuj thiab Hu Nkauj uas peb tsoom neeg ntseeg tseem siv los txog xyoo 2003 no. Peb tsa thawj lub tsev teev Ntuj. Peb qhia ib pab hluas kawm ua Xib Hwb. Peb txhais ntau zaj hauv Ntawv Moo Zoo los qhia lawv.
Thaum kuv tuaj nyob Roob Nyuj Qus, leej twg qhia lus Hmoob rau kuv ? Kawg yog cov Hmoob teev dab. Yog vim cov Hmoob teev dab pab qhia lus Hmoob ces peb thiaj ua tau tej phau qhia lub Moo Zoo. Peb yuav tsum ua cov Hmoob teev dab tsaug.
Tab sis lub caij ntawd kuv tseem thuam kev teev dab xws li peb cov Txiv Plig sawv daws thuam kam. Khuv xim ! Yuav nco lawv txiaj ntsim thiaj phim lawv kev pab peb.
Xyoo 1959, peb tus Tswv Qhia xa kuv mus tshaj Ntuj Lus nyob Xas Niam. Kuv nyob Xab Niam.ob xyoos. Peb cov Txiv Plig nrog cov Xib Hwb rov qhib ib lub tsev txais 15 leeg hluas kawm ua Xib Hwb. Lawv niaj lis piam mus qhia kev ntseeg rau ntau lub zos muaj tej yim txais kev ntseeg. Xyoo 1961, 200 tawm leej txais lub Cim Ntxuav nyob Xas Niam. Peb luam tau ib phau ntawv ntim lub Moo Zoo ntau zaj, muab rau cov Xib Hwb kawm. 
Xyoo 1961 ntawd, cov tub rog koom tshaj tuaj Cob Tsib teb tuaj txeeb lub nroog Xas Niam. Lawv niaj hnub hais tias lawv yuav ntes peb cov Txiv Plig. Peb xa cov hluas rov qab mus tsev, hos muaj ib tag kis peb cov Txiv Plig nrog ob tug Xib Hwb khiav mus txog lub Roob Pham This.
Nyob Pham This, peb 3 tug Txiv Plig nrog Xib Hwb Lauj Vam Thaiv thiab Lis Nkaj Teev nyob 3 lub hli. Nyob saum lub tsua Pham This muaj ntau pua tus tub rog  Hmoob tiv cov Koom Tshaj.
Niaj hnub kuv txhais Tsab Ntawv uas puag txheej thaud Paj Lug sau rau cov ntseeg nyob Los Mas. Niaj Hnub cov Koom Tshaj nyob nram hav tua phom rau lub Roob Pham This. Qhov kawg, cov tub rog Hmoob tso Pham This pov tseg. Kuv muab Paj Lug tsab ntawv rau cov Hmoob nyob ze Pham This. Lawv nqa mus zais hauv ib lub qhov tsuas. Ces peb 3 leeg Txiv Plig nrog ob tug Xib Hwb khiav mus . Peb khiav 26 hnub ces peb txog Luam Phab Npaas.
Kuv nrog Xib Hwb Lauj Vam Thaiv thiab Lis Nkaj Teev nyob 6 lub hli hauv cov Txiv Plig Is Tas Lias lub tsev nyob Luam Phab Npaas. Peb niaj hnub ua Phau Ntawv txhais lus Hmoob Dawb los ua lus Fab Kis, vim peb cov phau ntawv Hmoob poob tag nyob Xas Niam. Yaj Daus tuaj pab thiab. Peb rau siab ua nruab hnub hmo ntuj. Yog xyoo 1962.
Xyoo 1962, kuv nrog ob tug Xib Hwb mus nyob hauv Tswv Qhia Laus Nres (Loosdregt) lub tsev nyob Noos Npos, hauv lub nroog Vees Cas.Yuav nyob Vees Cas txij xyoo 1962 mus txog xyoo 1975. Yog lub caij ntawd ces T.P. Neej Vaj thiab T.P. Txhiaj Foom tuaj thiab. T.P. Neej Vaj twb xub nrog Hmoob nyob tau ntev xyoo lawm. T.P. Txhiaj Foom pib kawm lus Hmoob.
Peb rau siab ua dej num nyob Vees Cas. Peb qhib 3 lub tsev txais Hmoob :
– Ib lub txais cov ntxhais, yog cov Phauj Hmoob thiab Kas Nas Das saib;
– Ib lub txais cov hluas tub tuaj kawm ntawv nyob hauv lub nroog Vees Cas.
– Ib lub txais cov hluas kawm ua Xib Hwb mus qhia kev ntseeg nyob pem roob nyob hauv ntau lub zos Hmoob tab tom txais kev ntseeg.
Yog lub caij peb nyob Vees Cas mas peb thiaj tsim tej phau ntawv Hmoob ntau hauj sim. Ib nrab yog qhia kev ntseeg, ib nrab yog khaws cov txuj hmoob. Cov Xib Hwb thiab cov Txiv Plig sib pab khaws cov txuj Hmoob.
Xyoo 1961, peb kuj pib luam ib co ntawv uas niaj lub hli luam tawm ib zaug. Cov ntawv ntawd hu ua “Xov Xwm Ntawv Hmoob”. Peb luam “Xov Xwm Ntawv Hmoob” nyob Vees Cas mus txog xyoo 1975. Tom qab no, “Xov Xwm Ntawv Hmoob” hloov npe peb zaug. Xyoo 1976 nws hu ua “Ntsuag Xyoob Hlav”. Xyoo 1981, nws hu ua “Liaj Luv Chaw Tsaws”. Xyoo 1997, nws hu ua “Liaj Luv Xa Moo”.  
Thaum lub qab xyoo 1975, kuv mus nyob Fab Kis teb ib lub hli. Yos vim cov Koom Tshaj ntiab cov Txiv Plig qhia kev ntseeg nyob Los Tsuas teb kom lawv rov qab mus lawv teb chaws. Ces cov Txiv Plig rov mus nyob Fab Kis teb sib sau sab laj 3 hnub. Nyias xaiv nyias lub teb chaws yuav mus tshaj Ntuj Lus. Kuv rov mus nyob Thaib teb, yog lub 12 hli xyoo 1975.
Kuv rov mus nyob Tseej Maim rov qab qhib ib lub tsev txais tej tus tub hluas Hmoob-Thaib xyaum ua xib hwb thiab mus qhia tej lub zos pib txais kev ntseeg nyob tsis deb tsis ze ntawm Tseej Maim. Lub caij ntawd, ob tug Xib Hwb tau pab ntau dua yog ob tug hu ua Vaj Kuam.
Xyoo 1976, peb luam thawj zaug “Phau Ntawv Ntshiab” ua lus Hmoob Dawb. Yog ib txog hauj lwm loj. Peb kuj luam “Ntsuag Xyoob Hlav” ob peb zaug xwb. Yog ib txog hauj lwm me. Lwm txoj hauj lwm loj peb ua nyob Tseej Maim yog khaws cov txuj Hmoob.
Cov Hmoob nyob Los Tsuas teb ntau vam leej khiav los ua neeg thoj nam nyob Thaib teb. Nyob hauv cov neeg thoj nam ntawd muaj tej tus uas yog cov tau ua Xib Hwb nyob Los Tsuas teb. Kuj muaj cov laus neeg Hmoob coob tas nrho uas lawv paub cov txuj Hmoob, tab sis lawv tsis txawj sau ntawv Hmoob. Yog ib lub sij hawm zoo khaws cov txuj Hmoob.
Ib tug kws txuj Fab Kis hu ua Georges Condominas, (Koos Dos) nws khaws kam cov haiv neeg nyob As Xias teb cov txuj. Nws tuaj xyuas kuv nyob hauv peb lub tsev me me nyob Soi 12, Charoen Prathet Road. Koos Dos txhib kuv kom kuv khaws cov txuj Hmoob thiab nws pab thov tseem hwv Thaib (National Research Council) kom lawv pub kuv nyob Thaib teb 3 xyoos sib law.
Cov txuj Hmoob uas kuv xub khaws yog “Kab Tshoob Kev Kos” thiab “Kab Ke Pam Tuag”. Kuv vam txog cov xib hwb thoj nam kom lawv khaws Kab Tshoob Kev Kos thiab Kab Ke Pam Tuam ntawm cov laus. Kuv muab tej lub tshuab kaws lus thiab tej lub tshuab ntaus ntawv rau ib co Xib Hwb nyob hauv 4 lub yeej thoj nam loj, xws Tsheej Khoom, Nas Yos (Nam Yao), Vib Nais thiab Noos Khais. Cov Xib Hwb khaws cov txuj Hmoob, lawv muab ntaus hauv ntawv ua ib pob ntawv hnyav  kwv yees 10 kis lus.
Kuv siv zog ua dej num 3 xyoos. Kuv muab cov “Kab Tshoob Kev Kos” txhais los ua ib phau ua lus Hmoob thiab lus Fab Kis, vim cov kws txuj Fab Kis xav kom muaj ob xeem lus. Kuj tau muab txhais ua lus Aas Kiv thiab. Yog ob phau ntawv zoo ib yam, nyias muaj nyias 384 phab 21×33 cm. Phau ua lus Fab Kis tseem muaj 29 phab duab liab ntsuab. 
Thaum kuv ncaim ntawm Tseej Maim mas T.P. Tshaj Sawm ua nws cov hauj lwm loj ntev xyoo nyob Tsheej Maim.
Xyoo 1978, kuv mus kawm txuj ib xyoos nyob Pas Lis, Fab Kis teb, nyob hauv lub tsev qhia txuj txheej siab hu ua “Sorbonne” (Xos Npos). Kuv kawm txuj ua kws khaws cov haiv neeg txuj (Anthropologie). Cov Xib Hwb qhia peb puav leej tau ua tej phau ntawv nthuav tej haiv neeg nyob As Xias teb cov txuj. Kuv ua kuv phau ntawv ua ob xeem lus piav txog Kab Tshoob Kev Ko tiav tas lawm. Kuv muab ib phau rau tus kws txuj Koos Dos. Lawv qhuas tias yog ib co dej num loj. Lawv pub ib hom Dis Plos Mas Fab Kis hu ua Diplôme des Hautes Etudes en Sciences Sociales rau kuv. Tab sis hnub ntawd kuv txiav siab tias txij no mus kuv tsis ua ib phau ntawv muaj ob xeem lus ntxiv, vim cov dej num ntawd noj zim txwv ntau dhau. Thiab cov Hmoob tsis tshuas nyiam nyeem ib phau ntawv uas ib nrab yog xeem lus lawv tsis to taub. Ces txij xyoo ntawd los peb tsuas ua tej phau ntawv ua lus Hmoob xwb.