KEV THOV NTUJ YOG KEV NPUAB ZE, TSO SIAB THIAB SOV SIAB

"Txawm tias txiv neej thiab poj niam txoj kev nyiam yuav txawj xaus,
tiam sis Tswv Ntuj txoj kev nyiam tib neeg yuav nyob mus li.”
-Vaj Qhia Fas Ntshis Kus-
14-5-2020

Nyob hauv Hnub Plaub hauv Lis Piam, Vaj Qhia Fas Ntshis Kus ntuas tsoom sid sawv daws txog kev thov Ntuj tias yog kev npuab ze thiab tso siab rau Tswv Ntuj tseeb tiag.
Vaj Qhia pib tias kev thov Ntuj yog ib yam ntawm tib neeg, tsis hais coj kev teev hawm dab tsi los yeej paub thov Ntuj. 
Yog li Vaj Qhia thiaj caw ntiaj teb neeg sawv daws sib txoos thov Ntuj ua ke nyob hauv hnub tim 14 lub 5 hlis no, yog sib pab thov Ntuj kom tus kab mob Covid-19 no txhob ri mus ntxiv.
“Nyob hauv cov kws txuj mas lawv hais tias kev thov Ntuj yog yam tawm hauv neeg lub siab los.” Vaj Qhia hais li. “Yog tib neeg siv tag nrho lub tswv yim thiab lub cev los thov Ntuj.”
Vaj Qhia hais ntxiv tias kev thov Ntuj coj yus tawm deb ntawm yus mus nrhiav lwm tus. Yog ‘Kuv’ nrhiav ‘Koj’.
Peb cov ntseeg txoj kev thov Ntuj mas yog yam qhia tias ‘Koj’ tsis yog yam peb tsis paub. Huab Tais Tswv Ntuj yees tawm rau peb pom nyob hauv Huab Tais Yes Xus. Yog li peb cov ntseeg txoj kev thov Ntuj thiaj yog kev sib raug zoo nrog Tswv Ntuj, tsis muaj kev ntshai los ntxhov siab.
Vaj Qhia Fas Ntshis Kus hais ntxiv tias “Tswv Ntuj yog tus phooj ywm, yog tus kwv luag, yog tus nraug vauv.”
Vaj Qhia hais tias Huab Tais Yes Xus qhia peb tso siab nrhiav Tswv Ntuj thiab hu Tswv Ntuj ua ‘peb Leej Txiv’. Peb thiaj muaj cuab kav thov txhua yam thiab qhia txhua yam rau Huab Tais Tswv Ntuj.
Txawm tias peb yog ib tus me tshaj, los Tswv Ntuj yeej ncaj ncees thiab puag peb nyob hauv txoj kev khuv leej.
“Tswv Ntuj yog tus kwv luag muaj kev ncaj : txawm tias txiv neej thiab poj niam txoj kev nyiam yuav txawj xaus, tiam sis Tswv Ntuj txoj kev nyiam tib neeg yuav nyob mus li.”

Vam txog : Vaticannews.va/en
Tus txhais : Txawj Tsav Meej Mom Lauj, Zoo Tswv Zov Yaj