TEJ YAM TOB HAUV KEV TSIM TAU QHIB RAU PEB PAUB NYOB HAUV KEV THOV NTUJ

“Tib neeg tsis muaj tsim dab tsi li,
tiam sis Tswv Ntuj tau hu tib neeg los ua nws cov me nyuam.”
-Vaj Qhia Fas Ntshis Kus-
20/5/2020

Nyob hauv hnub tim 20 lub 5 hlis tas los no Vaj Qhia Fas Ntshis Kus tau hais txog kev sib txheeb ntawm kev tsim ntuj tsim teb thiab kev thov Ntuj.
Vaj Qhia hais tias nyob hauv Ntawv Ntshiab mas lub hauv paus yog kev tsim ntuj tsim teb zoo xws li zaj nkauj teev Ntuj ‘Tus tsim Ntuj tsim teb’ uas hais txog qhov zoo hauv txhua yam Tswv Ntuj tau tsim los.
Qhov zoo nkauj thiab qhov tob hauv kev tsim ntuj tsim teb yog thawj nqe nyob hauv kev thov Ntuj raws li Nkauj Paj Nruag zaj 8
Tib neeg tau thov Ntuj txog tej yam tob tob hauv txhua txhia yam nyob ib ncig tib neeg. Tib neeg ntsia saum ntuj, lawv pom cov hnub qub nyob thoob ntuj. Kev kawm txuj zim txwv no qhia peb txog nws lub hwj xyeej.
Zaj no ua rau tus thov Ntuj nws xav hauv nruab siab tias ‘Tib neeg yog dab tsi?’
Txawm tias tib neeg yog yam Ntuj tsim los tsis muaj zog, tiam sis tib neeg yog tib yam ras dheev txog qhov zoo nkauj nyob hauv txhua yam Tswv Ntuj tsim los.
Vaj Qhia hais tias tib neeg kev raug zoo nrog Tswv Ntuj yog yam loj tshaj plaws nyob hauv tib neeg, tib neeg tsis muaj tsim dab tsi li, tiam sis Tswv Ntuj tau hu tib neeg los ua nws cov me nyuam.
Vaj Qhia tseem piav txog lub hauv paus hauv kev tsim ntuj tsim teb. Vaj Qhia hais tias tus sau phau ntawv Hauv Paus sau txog haiv neeg His Xas Lais tawm hauv lawv thaj av thiab raug tsim txom.
“Lawv tsis muaj tsev nyob, tsis muaj tsev teev Ntuj, tsis muaj lub neej zoo ua thiab tsis muaj kev teev hawm. Lawv tsis muaj dab tsi li.”
Lawv pib nrhiav tswv yim los ua Tswv Ntuj tsaug, vim muaj Tswv Ntuj pov hwm kom lawv tsis ploj hauv ntiaj teb no mus.

Txawm tias nyob hauv peb lub neej muaj ntau yam xwv txheej thiab ntsib kev haub ntxias,
peb thov Ntuj ces peb yuav muaj zog thiab tso siab tias peb txoj sia yog txiaj ntsim ntawm Tswv Ntuj.

Vaj Qhia hais rau sawv daws tias “Kev thov Ntuj yog thawj lub zog hauv txoj kev vam khom, cov neeg thov Ntuj lawv lub ntsej muag yuav ci ntsa iab nyob hauv hmo tsaus ntuj nti.”
Kawg no Vaj Qhia kom peb sawv daws ua Tswv Ntuj tsaug vim nws pub txoj sia rau peb, peb yuav tsum muaj kev zoo siab, txhob ntxhov siab.
“Peb thov Ntuj mog!”

vam txog : Vaticannews.va/en
Tus txhais : Txawj Tsav Meej Mom Lauj, Zoo Tswv Zov Yaj