HNUB HWM COV TEB CHAWS NYOB AS FIV KAS SAB HNUB TUAJ

Cov teb chaws nyob As Fiv Kas sab hnub tuaj muaj xws li : Khas Nas teb, Nkas Npias teb, Nkis Nes As teb, Nas Mis Npias teb, Ntxas Npias teb, Mas Lis teb, Mos Lis Tas Nias teb, Les Xos Tos teb thiab Ntxis Npas Npus teb.
Hnub tim 25 lub 5 hlis 2020 no, cov teb chaws nyob sab hnub tuaj hauv xeev ntuj As Fiv Kas tau ua ntau yam kab ke los hwm lawv cov teb chaws. Lub rooj pwm tsav loj uas kav xeev ntuj As Fiv Kas sab hnub tuaj hu ua A.U, teeb tsa nyob hauv lub nroog Es Dis As Npas Npas, nyob teb chaws Es Thias Pias (Ethiopia).
Hnub hwm cov teb chaws hauv xeev ntuj As Fiv Kas, mas lawv ua ntau yam kev lom zem xyaw kab lis kev cai, muaj kiab khw muag zaub mov noj thiab tas txhua yam ua tawm los puav leej yog ua tiag tiag nyob ntawm sawv daws xub ntiag. Tab sis cov tseem hwv txwv tsis pub muaj kev sib tw tua phom. Ces nyob hauv lub rooj sab laj, mas lub rooj pwm tsav fab kev ruaj ntseg thiab saib xyuas kev thaj yeeb A.U thov kom sawv daws muab siab rau saib kev ruaj ntseg, tsis txhob pub kom muaj suab riam phom nrov ua rau neeg ceeb, vim lub zim txwv no tab tom muaj tus kab mob Covid-19, ces cov nom tswv xav ua cov kab ke kom sawv daws sib haum xeeb thiab lom zem kom tsoom pej xeem txaus siab xwb. 
Tseem hwv Aus Thas Lias hais tias : qhov uas cov tseem hwv As Fiv Kas sab hnub tuaj txwv tsis pub kom muaj suab riam suab phom nrov, mas ntshai tsam yuav ua rau neeg tig mus siv riam phom ntau dua qub. Txawm li cas los xij, cov tseem hwv Aus Thas Lias kuj zoo siab txhawb nqa txoj cai tsis pub sib tw tua phom nyob hauv cov teb chaws As Fiv Kas sab hnub tuaj. 
Dhau ntawm ua cov kab ke hwm cov teb chaws lawm, mas kuj tseem muaj sam thiaj sib koom hu nkauj Afreca Day thiab. Xyoo no lub Koom Haum As Fiv Kas A.U tseem npaj sij hawm 2 teev los sib koom hu nkauj uas yog cov nkauj nrov nyob xeev ntuj Africa sab hnub tuaj. Kom sawv daws pom txog cov teb chaws As Fiv Kas sab hnub tuaj cov tub ntxhais hu nkauj lawv txoj kev tiv thaiv thiab txhawj xeeb txog tus kab mob Covid-19. Cov nyiaj uas tau los ntawm kev hu nkauj, mas yuav coj mus pab cov neeg muaj mob. 
Hnub hwm cov teb chaws As Fiv Kas yog dab tsi ? 
Hnub hwm cov teb chaws As Fiv Kas yog hnub tim 25 lub 5 hlis txhua xyoo. Yog hnub uas lub Koom Haum A.U sau cov teb chaws As Fiv Kas los sib koom ua ke. Lub Koom Haum A.U thiaj pib tsa kom muaj hnub hwm cov teb chaws Africa sab hnub tuaj txij hnub tim 25 lub 5 hlis xyoo 1963 los txog zim txwv no. Vim li ntawd hnub tim 25 lub 5 hlis txhua xyoo thiaj yog hnub so ntawm cov teb chaws As Fiv Kas sab hnub tuaj. Xyoo no yog txwm 57 xyoo kev sib koom ntawm cov teb chaws As Fiv Kas. Kev sib koom ua cov kab ke yog ua kom sawv daws pom tias : cov teb chaws nyob hauv tuam teb As Fiv Kas muaj ntau lub xav ncaim, tab sis ntau lub kuj muaj kev sib haum xeeb thiab sib koom tes ruaj khov kawg.