LUB LEEJ HAUM KUJ DAWS TEEB MEEM KOOJ TXOM FAV NYOB AS FIS KAS

Lub koom haum saib xyuas txhiam xws noj thiab fab kev ua liaj ua teb ntawm lub Leej Haum Kuj hais tias : yog tias tsis nrhiav kev cheem cov kooj txom fav uas tab tom noj tsoom pej xeem tej qoob loo nyob As Fiv Kas li 1 lub hlis ntxiv, mas cov teb chaws nyob xeev ntuj As Fiv Kas yuav tshaib nqhis loj heev.
Lub koom haum saib xyuas txhiam xws noj thiab kev ua liaj ua teb hu ua FAO tshaj tawm nyob hauv tuam ceeb Ntses Nis Vas nyob Xus Is teb (Switzerland) tias : tam sim no cov kooj txom fav suab puam tau noj tsoom pej xeem tej qoob loo nyob hauv ntau lub teb chaws, nyob xeev ntuj As Fiv Kas. Pom tau tias yog ib qho teeb meem loj ntawm kev tshaib nqhis nyob As Fiv Kas toob fab naj. Muaj tsoom pej xeem 12 plhom leej raug kev tshaib nqhis loj heev, thiab tsis tuaj yeem yuav tiv thaiv tau cov teeb meem ntuj ua. Lub Leej Haum Kuj xav nrhiav peev nyiaj txiag li ntawm 76 plhom US dos las los mus pab tsoom pej xeem nyob hauv xeev ntuj As Fiv Kas, tab sis tam sim no FAO tsuas tau txais nyiaj pab ntawm cov teb chaws li 20 plhom US dos las xwb. Cov tseem hwv As Mes Lis Kas nyob Vas Sees Taas (Washington) pab 800,000 US dos las, cov teb chaws nyob Aws Los Pas pab 1 plhom Euro. Pom tias cov nyiaj no tseem tsis tau txaus raws li FAO lub hom phiaj. FAO xav coj cov nyiaj no mus pab cov teb chaws nyob As Fiv Kas tua tshuaj lom kooj txom fav. Xav tua tshuaj lom kooj rau ib thaj tsam dav kom tiav li 1 lub hlis tom ntej no. Yog tsis li ntawd, mas cov kooj txom fav yuav coob tuaj ntxiv li 500 npaug. Tam sim no Xos Mas Lis teb twb ceeb toom tias lawv lub teb chaws pib tshaib nqhis lawm, vim cov kooj txom fav muaj coob tas nrho. Nyob Kees Yas teb (Kenya), mas xyoo no yog ib xyoos uas kooj txom fav ua teeb meem loj tshaj nyob hauv 25 xyoos dhau los. Nyob Us Nkas Ntas teb, mas cov tub rog twb tau mus tua tshuaj lom kooj nyob txhua txhia qhov chaw hauv tsoom pej xeem tej liaj teb lawm. Txij tiam 20 los, mas tas ntiaj teb twb raug teeb meem kooj txom fav 6 zaus lawm. Zaum kawg nkaus kooj txom fav tshwm sim nyob hauv xyoo 1987 thiab 1988. Xyoo uas muaj cov kooj txom fav suab puam coob tshaj, mas yog xyoo 2003 txog 2005
Tus txhais : Lis Maib, Zoo Tswv Zov Yaj