COV PLOS TES TAAS THOV KOM TSEEM HWV TSO 24 TUS NEEG RAUG TXIM UAS LAWV RAUG LIAM TIAS THUAM KEV TEEV HAWM

Hnub tim 18 lub 6 hli 2020 no, cov neeg ntseeg Plos Tes Taas sib sau tawm tsam nyob hauv lub tuam ceeb Kas Las Ntsis, lawv thov kom cov tseem hwv tso 24 tug neeg uas lawv raug hiam tias thuam kev teev hawm. 24 tus neeg ntawd raug kaw nyob hauv ntau lub nkuaj hauv lub xeev Pas Ntsas. Yawg Shabir Shafqat uas nws yog tus thawj coj ntawm cov neeg ntseeg Plos Tes Taas hais tias : tus kab mob sib kis tab tom muaj ceem xws li cov neeg raug txim uas muaj coob coob. Tab sis 24 tus neeg Plos Tes Taas uas raug ntes kaw ntawd, tsim nyog lawv yuav tawm hauv nkuaj los. Muaj coob leej neeg raug txim uas raug tso tawm hauv nkuaj lub caij tus kab mob Covid-19 tab tom sib kis, tab sis 24 tus neeg ntseeg nyob Pas Kis Taas tsis raug tso tawm li. Lawv 24 leeg ntawd yog neeg dawb huv, lawv tsuas yog raug lwm tus neeg iab hiam xwb. 
Tsis tas li ntawd, David Khushi uas nws yog lwm tus kav xwm hauv cov Plos Tes Taas nyob Kas Las Ntsis, kuj thov kom cov neeg ntseeg thiab txhua lub teb chaws muab siab rau tiv thaiv hais txog kev quab yuam cov haiv neeg tsawg tej ntxhais nyob Pas Kis Taas teb, yuam kom lawv yuav txiv thaum hnub nyoog tseem yau. 
Xyoo 2003, tseem hwv Pas Kis Taas tau muab lub txim tuag rau cov neeg raug txim 4,500 zaug. Txij ntawd los, cov tseem hwv Pas Kis Taas tau muab cov neeg raug txim tua 515 leeg. Tam sim no tseem hwv tshuav 4,225 tus neeg raug txim tos txais lub txim tuag.