KEV TXAIS NTUJ LO LUS YOG KEV PUAG LEEJ PLEEV CIA.

Ntawv Moo Zoo hauv hnub chiv lis piam 15 caij Nruab Xyoos yog hais txog tus tseb nplej thiab cov av.
Hnub tim 12 lub hli no, nyob ntawm lub tuam tsev teev Ntuj hwm Leej Ntshiab Pob Zeb hauv Vas Tis Kas, Vaj Qhia Fas Ntshis Kus tau nthuav lo lus no rau ib zeej tsoom mloog. Vaj Qhia hais tias Huab Tais Ntuj Lo Lus zoo li lub ‘noob nplej’ uas tseb rau hauv cov av. Lub noob nplej ntawd yog Huab Tais Yes Xus. Yog leej twg txais Lo Lus ces yog nws tab tom khawm Leej Pleev ntag.
Kev txais Tswv Ntuj Lo Lus piv tau rau cov av. Cov av raws tog kev mas thaum tseb nplej rau mas muaj noog los khaws cov noob nplej mus tas. Cov av no yog qhov txaus ntshai kawg nkaus.
Cov noog khaws cov noob nplej ntawd yog tej lo lus xyav, lus hiam ua rau peb tag kev tso siab, tag kev ntseeg.
Ib txoj kev txais Tswv Ntuj Lo Lus yog cov av pob zeb. Cov noob nplej poob ntawm no nthaw kaus sai tiam sis kuj tuag tshav sai thiab vim tus cag nrhau tau tsis tob. 
Vaj Qhia piv tias cov av no zoo li cov neeg muaj siab kub lug thaum lawv hnov Ntuj Lo Lus, tab sis thaum lawv raug ntxias raug sim siab ces lawv tso txoj kev ntseeg pov tseg vim lawv tsis to taub Tswv Ntuj Lo Lus zoo.
Ib co zoo li cov av muaj hav pos. Cov pos no yog tej yam cuav, yog kev nplua nuj raws ntiaj teb. Vaj Qhia hais tias tus neeg twg raug tej no laum ces Tswv Ntuj Lo Lus yuav tsis txhawv thiab qoos noob nyob hauv nws.
Cov av zoo thiaj yuav ua rau Tswv Ntuj Lo Lus loj thiab txhawv qoos noob tau vim nws yuav nrhau cag tob thiab ruaj khov.
Thaum yuav sib ncaim, Vaj Qhia ntuas sawv daws tias Tswv Ntuj Lo Lus raug tseb thoob ntiaj teb, nyob hauv tib neeg txhua tus. Nyob ntawm peb sawv daws saib yuav xaiv ua cov av twg thiaj yuav ua rau lub noob nplej loj hlob thiab txhawv taus, thiaj yuav ua rau Tswv Ntuj Lo Lus txi txiv nyob hauv peb tau.