TSO TSEG KEV QUAB YUAM POJ NIAM

Hnub tim 20 lub 8 hli xyoo 2019 no, tus Tswv Qhia Liab nyob hauv lub nroog Pes Nplas (Puebla), nyob Mev Xis Kos tau hais txog kev quab yuam cov poj niam. Tswv Qhia hais tias : “Tsim nyog sawv daws yuav tawm los tiv thaiv thiab tso tseg tau lawm. Cov poj niam tsis tsim nyog poob hauv txoj kev quab yuam mos deev, tua pov tseg, quab yuam ua hauj lwm hnyav thiab lwm yam uas tsis tsim nyog rau cov poj niam. Txiv, thiaj thov kom sawv daws muab kev koom tes tiv thaiv thiab daws cov teeb meem no. Thov kom sawv daws ua siab ntev thiab muab siab rau txuag tej yam ntshiab huv uas tsim nyog yuav tiv thaiv. Txiv thiaj xav kom sawv daws tso tseg txoj kev quab yuam cov poj niam thiab txhua tus tib neeg.” Hais txog cov teeb meem quab yuam cov poj niam, mas pom tshwm sim ua ntu zus los mus. Cov poj niam nyob Mev Xis Kos teb tuaj sib sau ua ke coob coob, mas yog ib zaug kev sib sau loj kawg, vim cov poj niam sib sau taij kom sawv daws tso tseg thiab sib pab tiv thaiv kev quab yuam saib tsis taus cov poj niam thiab kom hwm cov poj niam. Lub rooj ntawv xov xwm nyob Mev Xis Kos teb tshaj tias : nyob hauv ib hnub, mas muaj cov poj niam raug tua pov tseg li 3 leeg thiab 49 leeg raug quab yuam ua dev ua npua, ces yog ib yam teeb meem txaus txhawj kawg. Nyob hauv 6 lub hlis xyoo no, twb muaj cov poj niam raug tua lawm 470 leej. Muaj 111 leeg yog raug phom tua tuag, 99 leeg yog raug xuas riam nkaug, 261 leeg yog raug lwm yam tuag. Nyob hauv ib lub hlis twg, mas muaj 1,530 tus poj niam raug neeg mos deev. Muab xam los mas nyob hauv ib hnub, yuav tsum muaj 50 tus poj niam raug mos deev. Vim li ntawd, thiaj muaj 2 tug Tswv Qhia nyob Mev Xis Kos teb tawm los nqua hu kom sawv daws pab tiv thaiv txuag cov poj niam thiab tso tseg txoj kev quab yuam cov poj niam. Lub nroog Pes Nplas (Puebla), yog lub nroog loj thiab muaj cov neeg ntseeg Kav Tos Liv uas lawv txoj kev ntseeg ruaj khov kawg nyob hauv lub Cheeb Koom Txoos. Nyob nrug deb ntawm lub nroog Mev Xis Kos toob fab naj li 100 km.