COV NTSEEG YOG TUS KWS KHO MOB SAB NTSUJ PLIG THIAB CEV NQAIJ.

Hnub tim 5 lub 8 hli no, Vaj Qhia Fas Ntshis Kus rov tuaj ntuas cov ntseeg sawv daws tias txawm ntiaj teb neeg tab tom ntsib xwm txheej tus kab mob COVID-19 thiab kev tshaib nqhis, los thov peb nco ntsoov tias Ntuj Ceeb Tsheej thiab Huab Tais Yes Xus txoj kev cawm txawm tos peb.
Ntuj Ceeb Tsheej yog Ceeb Tsheej muaj kev ncaj ncees thiab kev thaj yeeb nyab xeeb. Peb yuav pom lub Ceeb Tsheej no nyob hauv kev pab luag lwm tus. Kev ntseeg ruaj nreb, kev vam khom thiab kev pab lwm tus tau ntxuav peb kom ntshiab tuaj. Qhib peb ob lub qhov muag kom pom lub ntuj tshiab nyob hauv lub zim txwv raug kev txom nyem no.
Nyob hauv ntawv Moo Zoo, peb yuav pom tias Huab Tais Yes Xus tau kho cov neeg mob thiab ntiab dab tawm hauv cov neeg raug dab. Huab Tais Yes Xus coj lawv rov los cuag lawv tsev neeg.
Nyob hauv zaj Huab Tais Yes Xus kho tus neeg tuag ceg hauv Kas Fas Naus, mas ib pab neeg dauv tus tuag ceg pw hauv nws lub txaj nqes mus hauv Yes Xus xub ntiag. Yes Xus pom lawv ntseeg, ces Yes Xus hais tias : “Me kwv, kuv daws koj cov txhaum tas lawm.” Thiab hais ntxiv tias : “Koj sawv, koj nqa koj lub txaj, koj rov mus tsev.” (LK.5:17-26)
Vaj Qhia hais rau sawv daws tias : Yam hwj huam Huab Tais Yes Xus ua no yog vim Huab Tais Yes Xus pom lawv txoj kev ntseeg, lawv txoj kev vam khom thiab vim lawv txoj kev sib nyiam sib hlub.
Vaj Qhia rov hais ntxiv tias cov ntseeg yog Huab Tais Yes Xus cov thwj tim, yog tus kws kho mob sab ntsuj plig thiab sab cev nqaij. 
“Nej yuav nco cia tias nej raug hu los ua txoj hauj lwm no.”