COV NTSEEG YUAV NYOB TOS TWJ YWM TSIS TAU.

Hais txog tib neeg txoj kev sib txeeb lag luam thiab huab noj huab haus, ua rau lwm tus neeg tsis muaj noj tsis muaj haus txaus. Ces zoo li lub ntiaj teb tab tom nyob hauv txoj kev sib txeeb sib huas, qhov no cov neeg ntseeg yuav nyob twj ywm saib xwb tsis tau. Cov neeg ntseeg yuav sib koom ua ke nyob hauv Tswv Ntuj lub zog, sib koom siab koom ntsws ua tej yam hauj lwm pab neeg kom muaj kev ncaj ncees. Vaj Qhia hais cov lus no nyob hauv lub tsev khaws txuj Apostolic Palace. 
Vaj Qhia xav qhia txog kev ntseeg lub ntsiab ntawm kev sib hlub thiab txuag lub neej yav tom ntej kom zoo tuaj. Qhov yuav ua kom txhua yam zoo tuaj thiab tib neeg tau nyob twj lij, yuav tsum yog sawv daws sib koom tes kho thiab ua, mas thiaj yuav tshwm sim. 
Tswv Ntuj tau tsim txhua tsav puas yam nyob hauv lub ntiaj teb no thiab tso rau neeg ua tus kav, mas phim neeg yuav sib pab txuag thiab ua raws Tswv Ntuj cov Lus. 
Neeg muaj cai txuag txhua yam nyob hauv lub ntiaj teb no thiab tej nroj tsuag xyoob ntoo. Neeg yuav tsum txuag lub ntiaj teb thiab paub tias yam twg yog yam yuav yug neeg txoj sia kom nyob nrog lub ntiaj teb, vim lub ntiaj teb yog sawv daws tug tsis yog 2-3 leeg tug xwb. 
Tus twg muaj cai thiab muaj peev xwm, mas nws yuav saib xyuas txhua yam nyob ntiaj teb no mus raws txoj cai. Yog vim ntiaj teb neeg nyias khav nyias ua tus loj thiab txeeb txhua yam ua nws ntiag tug, thiaj ua kev piam sij rau tib neeg kev lag luam thiab tej hav zoov nroj tsuag uas Tswv Ntuj ua tus tsim. Ua kom lub ntiaj teb tsis muaj kev ncaj ncees nyob hauv tej pawg neeg coob coob. Zoo li txoj kev txhaum tab tom kav neeg thiab kav tej nroj tsuag xyoob ntoo. Kev piam sij tsis yog lub hom phiaj ntawm Tswv Ntuj txoj kev tsim lub ntiaj teb.