COVID-19 NYOB AS MES LIS KAS TEB

As Mes Lis Kas teb cov neeg tuag los ntawm tus kab mob Covid-19, coob dua cov tub rog As Mes Lis Kas uas tuag nyob hauv ntsuj tsov rog Nyab Laj.
Raws li cov tub xov xwm Thaib coob leej tau sau cim tseg, mas pom tias As Mes Lis Kas teb muaj cov neeg tuag los ntawm tus kab mob Covid-19, yog 61,656 leej. Coob dua cov tub rog As Mes Lis Kas uas tuag nyob hauv ntsuj tsov rog Nyab Laj.
Ntsuj tsov rog Nyab Laj yog pib txij lub 12 hlis xyoo 1955 txog hnub tim 30 lub 4 hlis xyoo 1975, uas yog xyoo lub tuam ceeb Saigon tawg. Ntsuj tsov rog ntawd, cov tub rog Nyab Laj tuag lawm 1 plhom 200 txhiab leej, hos tsoom pej xeem tuag li ntawm 2 plhom tawm leej. 20 xyoo hauv ntsuj rog Nyab Laj, mas cov tub rog As Mes Lis Kas raug tua tuag li ntawm 58,220 leej. Txhais tias ib lub hlis cov tub rog As Mes Lis Kas raug tua tuag 2,911 leeg.
Thawj tus neeg tuag los ntawm tus kab mob Covid-19 nyob As Mes Lis Kas teb, yog hnub tim 1 lub 3 hlis 2020. Thawj tus neeg mob Covid-19 tuag nyob Thaib teb kuj yog tib hnub ntawd thiab. Los txog rau tam sim no yog 60 tawm hnub lawm, cov neeg As Mes Lis Kas mob Covid-19 tuag yog 61,656 leej. Txhais tias nyob hauv ib hnub, mas muaj neeg tuag los ntawm tus kab mob Covid-19 987 leej.
Tam sim no nyob As Mes Lis Kas teb, cov neeg mob Covid-19 yog 1,064,572 leeg. Muaj 5 lub xeev nyob As Mes Lis Kas teb uas muaj cov neeg mob Covid-19 thiab tuag coob tshaj, yog lub xeev New York, lub xeev New Jersey, lub xeev Mev Xas Tshus Xem (Massachusetts), lub xeev Illinois thiab lub xeev California.