NTUJ QHUAV DEJ NYAB THIAB COVID-19 NYOB SUAV TEB.

Xyoo no kev sau qoob loo ntawm tsoom pej xeem Suav, mas tau tsis ntau pes tsawg. Yog vim thaum tsis los nag, mas ntuj qhuav heev. Tab sis yog los nag, mas kuj ua rau dej nyab tsoom pej xeem tej liaj teb thiab tus kab mob Covid-19 kuj sib kis tas zog. Cov huab cua txawv txav xyoo no, ua rau tsoom pej xeem tej pob kws, tej nplej thiab mog piam sij lawm ntau heev. Ces yuav ua teeb meem loj hais txog txhiam xws noj nyob Suav teb. Tsis tas li ntawd, kev lag luam nyob Suav teb mus rau As Mes Lis Kas kuj muaj teeb meem los ntawm tus kab mob Covid-19 thiab. Vim li ntawd tus Txoov Tim Tswv Xim Ceej Pheem thiaj ceeb toom kom tsoom pej xeem xyuam xim thiab txuag txhiam xws noj. Lub 5 hlis xyoo no ntuj qhuav heev nyob Suav teb, lub 7 hli thiab 8 hli ntuj los nag loj heev thiab muaj dej nyab, ces ua rau tsoom pej xeem tej qoob loo piam sij ntau kawg. Tus kab mob Covid-19 kuj sib kis nyob hauv ntau qhov chaw, ces ua rau kev xa txhiam xws noj mus qhov txhia chaw tsis yoom yim. Tsoom pej xeem ua liaj ua teb yuav tsum sau nplej thiab sau pob kws coj los khaws tseg, vim tias lawv ntshai tsam tus nqi txhuv nce siab. Kev ceev txhiam xws noj ntawm tseem hwv kuj poob qis dua tsaib no lawm. Tam sim no lub teb chaws muaj ntau yam kub ntxhov, tsis paub tias tsov rog yuav sawv tuaj thaum twg. Vim li ntawd tsoom pej xeem thiaj txhawj xeeb txog kev tshaib nqhis ntawm lub teb chaws, vim txhua yam yuav kim tuaj.