THAIB TEB TIV THAIV COVID-19 TAU ZOO HEEV

Kev tiv thaiv tus kab mob Covid-19 nyob thoob ntiaj teb, mas tsis yog ib qho yooj yim. Vim peb pom tias muaj ntau lub teb chaws, mas tsoom pej xeem mob Covid-19 tuag coob kawg. Tus kab mob Covid-19 muaj neeg tuag coob thiab heev tshaj ib ntsuj tsov rog loj. Muaj qee lub teb chaws, muaj cov neeg mob Covid-19 tuag ntau caum txhiab leej, ces tsis muaj toj ntxas faus. Cov tseem hwv cia li siv tsheb khawb tej lub qhov ntxa loj loj los muab cov neeg tuag faus ua ke xwb. Tus kab mob Covid-19, ua rau neeg ntiaj teb muaj kev txhawj xeeb, muaj kev ntshai thiab tsim kev kub ntxhov loj kawg rau tas ntiaj teb. Yam li ua rau neeg poob hauj lwm, kev lag luam poob qis, muaj tub sab tub nyiag, cov neeg pluag txom nyem tsis muaj noj, ces lawv dai tuag. Cov koom haum dav hlau, koom haum lag luam tsis hais nruab nquab los nruab deg, koom haum khiav tsheb, cov tuam txhab ua hauj lwm, txhua yam kev nrhiav noj nrhiav haus ntawm tsoom pej xeem kub ntxhov tas nrho. Kev tiv thaiv tus kab mob Covid-19 zaum no, muaj ntau tus thawj coj nyob ntiaj teb qhuas txog cov tseem hwv Thaib thiab tsoom pej xeem Thaib txoj kev tiv tus kab mob Covid-19 kawg. Yam li tus qub pwm tsav Aas Kiv fab saib xyuas kev noj qab haus huv, cov tseem hwv Zis Pees, lub Koom Haum saib xyuas kev noj qab haus huv (WHO), cov nom sawv pej xeem cev nyob Aas Kiv teb, rooj ntawv xov xwm nyob Zes Mas Nias, tus sawv cev lub Koom Haum WHO nyob Thaib teb, As Mes Lis Kas tus tiam lis nyob Thaib teb thiab tus Txoov Tim Tswv TRAMP qhuas tias Thaib teb yog lub teb chaws tiv thaiv tau tus kab mob Covid-19 zoo tshaj nyob As Xias teb. Vim Thaib teb muaj cov neeg mob Covid-19 txog 3,009 leeg, kho zoo lawm 2,787 leej, tuag 56 leej. Txhais tias Thaib teb tiv thaiv tau kab mob zoo heev thiab cov kws kho mob Thaib muaj peev xwm kawg. Lub Koom Haum saib xyuas kev noj qab haus huv nyob thoob ntiaj teb (WHO), kuj qhuas txog cov kws kho mob Thaib hais tias : cov kws kho mob Thaib muab siab rau kho cov neeg mob tau zoo heev. 

Tus txhais : Lis Maib, Zoo Tswv Zov Yaj