TUS KAB MOB COVID-19 UA KEV KUB NTXOV NYOB THOOB NTIAJ TEB

Nyob Mias Mas teb cov tseem hwv Mias Mas npaj cov khw muag txhiam xws noj rau ntawm tshav puam, ces zoo li cov khw muag txhiam xws noj tsis kaw. Cov muag txhiam xws toob xib los tau kev muag, hos cov muas noj los tsis tu ncua, vim lawv muas tau txhua yam. Tab sis cov khw tshav puam, mas yuav tsum nyob muaj chaw raws tseem hwv kos kab tseg thiab sib nrug kom deb. Ua li no mas tsoom pej xeem tau kev kav kiab kav khw yam tsis ntshai kis tus kab mob Covid-19.
Nyob Nis Zes Lias teb, cov tseem hwv kaw lub nroog Las Kos, lub nroog As Npus Ntsas thiab lub nroog Os Kus, tsis pub tsoom pej xeem tawm hauv tsev mus sab nraud thiab tsis pub lwm cov neeg nyob txawv nroog nkag mus hauv cov nroog no. Tab sis kev kaw nroog tiv thaiv tus kab mob Covid-19 rais ua teeb meej loj kawg rau tsoom pej xeem. Yam teeb meem loj uas txaus ntshai tshaj tus kab mob Covid-19, yog muaj tub sab coob. Niaj hnub muaj tub sab nyiag noj nyiag haus coob kawg, tsis hais nruab hnub los hmo ntuj. Tsoom pej xeem txhua yim yuav tsum tuav hneev, tuav riam, tuav kav hlau thiab dab tsi uas zoo tiv thaiv tus kheej, mas tsoom pej xeem siv tas. Vim muaj tub sab coob thiab tab meeg nyiag ub nyiag no, ntaus neeg tua neeg, ces ua rau tsoom pej xeem ntshai tub sab heev dua ntshai tus kab mob Covid-19 lawm. Yam uas txaus ntshai tshaj tus kab mob Covid-19, thiaj yog tib neeg lub siab lim hiam. Yog ib qho txaus txhawj kawg nkaus, vim tsoom pej xeem txoj kev tshaib nqhis yuav noj yuav haus, thiaj ua rau muaj kev huab noj huab haus, sib ntaus sib tua yam txaus ntshai kawg.