KEV SIB NTAUS SIB TUA NYOB MIAS MAS TEB.

Hais txog kev sib ntaus sib tua nyob hauv lub xeev Yab Khaim nyob Mias Mas teb, mas muaj ua ntu zus thiab kub ntxhov los txog tam sim no. Lub Leej Haum Kuj tau thov kom tas ntiaj teb tso kev sib ntaus sib tua tseg thiab sawv daws tig los sib koom tes tiv thaiv tus kab mob Covid-19. Thawj 3 lub hlis nyob hauv xyoo 2020 no, muaj cov me nyuam yaus raug tua tuag thiab cov tuag tes tuag taw nyob Mias Mas teb coob dua tsaib ub lawm 6 npaug. Raws kev soj ntsuam txij lub 1 hlis los txog lub 3 hlis xyoo no, mas cov me nyuam yaus nyob hauv lub xeev Yab Khaim raug tua tuag 18 leej, thiab muaj cov me nyuam tuag tes tuag taw li ntawm 71 leeg. Kev ua tub sab tub nyiag thiab sib ntaus sib tua nyob hauv lub xeev Yab Khaim, mas yog ib yam teeb meem loj rau cov me nyuam yaus. Ces pom tau tias cov me nyuam yaus raug tua tuag thiab raug quab yuam nyob Mias Mas teb, yog qhov teeb meem loj tshaj nyob Mias Mas teb zim txwv no. Txij xyoo 2018 los, mas kev kub ntxhov nyob Mias Mas teb rov heev zuj zus thiab los rau xyoo no kuj ntsib tus kab mob Covid-19, mas tsoom pej xeem Mias Mas nyob hauv lub xeev Yab Khaim ntsib teeb meem loj kawg. Cov me nyuam yaus raug quab yuam thiab raug tua tuag yog 35 feem pua. Kev quab yuam no yog hais txog cov me nyuam tub uas hnub nyoog qis dua 15 xyoos, lawv raug sau mus ua tub rog tuav riam tuav phom sib ntaus rog.